Bolat Aqsholaqov munaı eksportynyń balamaly baǵyttaryn atady

ASTANA. QazAqparat – Munaı eksportynyń balamaly baǵyttaryn damytýdyń jol kartasy ázirlendi. Bul týraly Úkimet otyrysynda QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Respýblıka úshin ekonomıkalyq tıimdilikti arttyrý maqsatynda ádil ekonomıka bóliminde iri munaı gaz jobalarynyń seriktesterimen olardy damytýdyń keshendi josparyn qabyldaý boıynsha jumys júrgiziletin bolady. 2029 jylǵa qaraı Shymkent munaı óńdeý zaýytyn 9 mln tonnaǵa deıin keńeıtý jobasyn aıaqtaý josparlanýda. Bul qaıta óńdeý kólemin jylyna 21 mln tonnaǵa deıin arttyrýǵa múmkindik beredi», - dedi mınıstr.

Onyń atap ótýinshe, Prezıdenttiń eksport baǵyttaryn ártaraptandyrý jónindegi tapsyrmasy aıasynda Munaı eksportynyń balamaly baǵyttaryn damytý jónindegi jol kartasynyń jobasy ázirlendi.

«Osylaısha, Ázerbaıjan, Grýzııa jáne Túrkııa porttary baǵytynda Transkaspıı halyqaralyq kólik baǵytyn damytýǵa, sondaı-aq Qytaı Halyq Respýblıkasy men Iranǵa eksporttyq baǵyttarǵa basa nazar aýdarylatyn bolady», - dedi Bolat Aqsholaqov.