Bolat Aqsholaqov: qurylysty túzetýge qaraǵanda, birden durystap salǵan áldeqaıda arzan
ATYRAÝ.KAZINFORM - Atyraý oblysynyń ákimi Bolat Aqsholaqov qurylys sapasy jáne mektepterdi jańa oqý jylyna daıyndaý máseleleri boıynsha apparat otyrysyn ótkizdi.
Aımaq basshysy memlekettik satyp alýdy jarııalamas buryn qurylys jobalaryn tekseretin vedomstvoaralyq komıssııa qurý jóninde pármen berdi. Bul qateler men kemshilikterdi qurylys kezine deıin jetkizbeı, jobanyń bastapqy kezeńinde anyqtaýǵa múmkindik beredi.
Jıynda merdigerlermen aradaǵy esep-qısaptyń ashyqtyǵyn qamtamasyz etý úshin Open Book ashyq baǵa belgileý júıesin engizý tapsyryldy. Sondaı-aq jobalaý-smetalyq qujattamany aldyn ala tekserýge múmkindik beretin jasandy ıntellekt quraldaryn engizý júkteldi.
Bul qateler men yqtımal jaǵdaılardy jedel anyqtap, mamandardyń jumysyn ońtaılandyrýǵa jáne adamı faktordyń áserin azaıtýǵa jaǵdaı jasaıdy.
Oblys ákimi mektep salý jáne jóndeý máseleleri oqý jylynyń bastalýyna sanaýly kún qalǵanda emes, aldyn ala sheshilýi tıis ekenin de erekshe atap ótti.
Aıtylǵan baǵyttar boıynsha 10 qyrkúıekke deıin usynystar daıyndaý tapsyryldy.
