Bolat Aqsholaqov QHR elshisimen ınvestıtsııalyq yntymaqtastyqtyń perspektıvalaryn talqylady
ATYRAÝ. KAZINFORM — Atyraý oblysynyń ákimi Bolat Aqsholaqov QHR-dyń Qazaqstandaǵy Tótenshe jáne ókiletti elshisi Han Chýnlınmen kezdesti. «Dóńgelek ústel» formatyndaǵy jıynǵa Qazaqstanda jumys isteıtin qytaılyq kompanııalardyń ókilderi de qatysty.
Bolat Aqsholaqov aımaqtyń Qytaımen ekonomıkalyq baılanysty nyǵaıtýǵa múddeli ekenin aıtyp, oblystyń ınvestıtsııalyq áleýeti, «UINT» jáne «Atyraý» arnaıy ekonomıkalyq aımaqtary, ındýstrııalyq alańdar jáne ınvestıtsııa kólemi shamamen 120 mln dollar bolady dep josparlanǵan «Eýrazııa» tehnologııalyq ınnovatsııalar parkiniń jobasy jaıynda áńgimelep berdi.
QHR elshisi yntymaqtastyqtyń úsh baǵytyn atap kórsetti. Olar: ónerkásip jáne ınvestıtsııalar, ekologııalyq tehnologııalar, bilim berý men gýmanıtarlyq baılanystar.
Ónerkásiptegi perspektıvaly baǵyttar sapynda munaı men gazdy tereń óńdeý, munaı-hımııa, mashına jasaý jáne logıstıka bar. Ekologııalyq kún tártibinde shóleıttenýge qarsy kúres, sý únemdeý tehnologııalary, káriz júıelerin jáne aqaba sý tazartý qurylystaryn jańǵyrtý jobalary kórsetildi. Al bilim berý salasynda S. Ótebaev atyndaǵy Atyraý munaı jáne gaz ýnıversıteti bazasyndaǵy birlesken bilim berý ortalyǵynyń jumysy, óńiraralyq jáne mádenı baılanysty odan ári damytýdyń potentsıaly aıtyldy.
Bolat Aqsholaqov aýyl sharýashylyǵy jáne ónimdi óńdeý, qurylys materıaldaryn shyǵarý jáne munaı-hımııaǵa ınvestıtsııa tartý boıynsha yntymaqtastyqqa múddeli ekenin bildirdi. Buǵan qosa, sý únemdeý tehnologııalaryn qoldaný jáne tsıfrlyq sheshimderdi, IT-hab pen Smart City jobalaryn damytýdyń múmkindikteri de talqylandy.
— Biz seriktestermen aýyl sharýashylyǵy, qurylys materıaldaryn shyǵarý, ónerkásip, shaǵyn jáne orta bıznes salalarynda ózara tıimdi yntymaqtastyq ornatýǵa daıynbyz, — dedi Bolat Aqsholaqov.
Óńir basshysy kezdesýdi qoryta kele, qytaılyq kompanııalardy kelesi jyldyń basyna josparlanǵan ınvestıtsııalyq forýmǵa qatysýǵa shaqyrdy. Ol oblystyń ınvestıtsııalyq atlasy daıyndalyp jatqanyn da jetkizdi. Elshi bul jaıynda múddeli kompanııalardy habardar etýge daıyn ekenin aıtty. Taraptar yntymaqtastyqtyń perspektıvaly baǵyttary boıynsha ári qaraı jumystanýǵa ýaǵdalasty.
