Bolat Aqsholaqov gaz qostyrýdyń qymbattyǵyn moıyndady

ASTANA. QazAqparat – Gazǵa qosylý qunyn tómendetýge baǵyttalǵan birneshe nusqa qarastyrylyp jatyr. Bul týraly Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Shynymen de, birqatar óńirde gazǵa qosylý qunynyń joǵary ekendigi baıqalady. Qazirgi ýaqytta Qazaqgaz ben ergilikti ákimdikter birlesip, bul máseleni qarastyryp jatyr, qosylý qunyn tómendetýge qatysty birneshe usynys bar. Búgin Almaty oblysynyń ákimi júrgizilgen is-sharalardyń arqasynda qosylý qunyn eki esege tómendetýge múmkindik bolǵanyn aıtty. Óıtkeni, shyndyǵynda da quny óte joǵary. Qazir ony qalaı tómendetý kerektigine qatysty nusqalardy qarastyryp jatyrmyz», - dedi Bolat Aqsholaqov Úkimet otyrysynan keıin BAQ ókilderiniń saýalyna oraı.

Mınıstr gazǵa qosylý qunynyń qanshalyq tómendeýi múmkin ekendigin boljaý qıyn ekendigin aıtady. Óıtkeni, jabdyqtardyń birneshe túri bar.

«Gazdy úıge deıin jetkizý qajet. Odan keıin esepteý júıesi, qazandyq qajet. Bul oraıda jabdyqtardyń qunyn eskergen jón. Sebebi olar ázirshe ózimizde shyǵarylmaıdy. Olardy syrttan ákelemiz. Eger japaı gazdandyrý baǵdarlamasyn qolǵa alsaq, onda ol materıaldardy ózimizde óndirý jaǵyn oılastyrý qajet», - dedi ol.

Onyń atap ótýinshe, bıyl elimizdi gazdandyrý deńgeıin 60 paıyzǵa jetkizý qajet. Al oǵan qajetti qarajatty esepteý kerek. Jalpy bıyl gazdandyrý jumystaryna 73 mlrd teńge kózdelip otyr.

«Bul magıstraldy gaz qubyryna jumsalatyn shyǵyn mólsheri. Biz gazben jabdyqtaýǵa qosylǵan azamattardyń sanyn 11,6-11,7 mln adamǵa jetkizýimiz kerek», - dedi mınıstr.

Foto: varva-slovo.com.ua