Bolat Aqsholaqov elektr stantsııalaryn jańǵyrtý jobalary týraly aıtty

ASTANA. QazAqparat – Elimizdegi elektr stantsııalaryn jańǵyrtý jobalary 2027 jylǵa deıin energııa qýatyn kóterýge múmkindik beredi. Bul týraly Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde Energetıka mınıstriniń mindetin atqarýshy Bolat Aqsholaqov aıtty, dep habarlaıdy QazAqparat tilshisi.

Bıylǵy 1 shildeden bastap elektr energııasy naryǵynyń jańa modeline kóshý josparlanyp otyrǵanyna toqtalǵan ol:

«Naryqtyń jańa modeli elektr energııasyna qatysty qajet jobalardy iske asyrýǵa múmkindik beredi. Qazirgi kezde jumys istep turǵan elektr stantsııalaryn jańǵyrtý boıynsha jobalar iske asyrylyp jatyr. Olar 2027 jylǵa qaraı 1 700 MVt-tan astam elektr energııasyn iske qosýǵa múmkindik beredi. Qyzylorda qalasynda jáne Túrkistan oblysynda jalpy qýaty 1 200 MVt-tan asatyn manevrlik qýattardyń qurylysy júrip jatyr. Sondaı-aq Kókshetaý jáne Semeı qalalarynda jańa Jylý elektr ortalyǵyn salý boıynsha jobalar pysyqtalyp otyr», - dedi.

Onyń aıtýynsha, Ekibastuzdaǵy GRES-2-niń №3-4 bloktaryn salý, sondaı-aq Almaty energııa kesheniniń energııa kózderin jańǵyrtý boıynsha jobalardy iske asyrylyp jatyr.

Budan basqa, Ulttyq elektr jelisin jańǵyrtý, onyń ishinde Batys jáne Ońtústik aımaqtardyń energııa júıesin kúsheıtý, Batys aımaqty Birtutas elektr energetıkasy júıesine qosý jumystary qamtylǵan.