Bolat Aqsholaqov Atyraý oblysynyń ustazdaryn Muǵalimder kúnimen quttyqtady
ATYRAÝ. KAZINFORM — Atyraýda jyl saıyn 5 qazanda atalyp ótetin Muǵalimder kúnine arnalǵan «Ustaz – bilimniń shamshyraǵy» atty saltanatty is-shara ótti.
Oblys ákimi Bolat Aqsholaqov pedagogterdi kásibı merekemen quttyqtap, olardyń eńbegine, bilim berý men óskeleń urpaqty tárbıeleýge qosqan úlesine alǵys aıtty.
– Ustazdyq – jaı ǵana qyzmet emes, bul – uly mıssııa. Eldiń bolashaǵy – jas urpaqtyń qolynda, al sol jas býyn sizder bergen bilim men tárbıeniń arqasynda qalyptasady. Árıne, bul baǵytta mektep, ata-ana jáne qoǵam bolyp birlesip jumys istegende ǵana jaqsy nátıjege jete alatynymyzdy este ustaýymyz kerek. Sońǵy jyldary bilim berý uıymdarynyń ınfraqurylymyn jaqsartýǵa arnalǵan aýqymdy jumys júrgizilip jatyr. Qazirgi zaman talabyna saı jańa «Keleshek mektepter» salynyp, eski mektepter jóndelý ústinde. Munyń bári – oqýshylarǵa sapaly bilim berýge jaǵdaı jasaý maqsatyndaǵy sharalar. Prezıdent Joldaýynda muǵalimderge jańa talaptarǵa saı biliktilik arttyrý, jańa oqytý ádistemelerin meńgerý sııaqty mańyzdy tapsyrmalar berildi.
Bul – qazaqstandyq bilim berý júıesin álemdik deńgeıge kóterýge baǵyttalǵan qadam jáne ol urpaq bolashaǵyna tikeleı áser etedi dep oılaımyn. Mereke qutty bolsyn! Ustaz — shákirtimen bıik. Talapty, bilimdi, oıly oqýshylar kóp bolyp, elimiz gúldene bersin! – dedi oblys ákimi.
Prezıdent Jarlyǵymen birqatar pedagog bilim salasyn damytýǵa qosqan úlesi men kóp jylǵy adal eńbegi úshin memlekettik nagradalarmen marapattaldy.
