Bolashaqtyń medıtsınasy qandaı bolady - doktor Greıdiń kózqarasy

ASTANA. QazAqparat - «Sens» ǵylym qorynyń tóraǵasy Obrı Dı Greı bolashaqtyń medıtsınasy týraly aıtyp berdi, dep habarlaıdy QazAqparat tilshisi.

«Qazir biz adamdy emdeý sharalaryna negizgi basymdyq beremiz. Ondaı medıtsına artta qalady. Bolashaqtyń medıtsınasy adam aǵzasyndaǵy protsessterdi qalpyna keltirýmen aınalysatyn bolady. Kólikti qalaı jóndesek, bolashaqtyń medıtsınasy da adamnyń densaýlyǵyn solaı qalpyna keltiredi. Jasýshalardy jańartý, genetıkalyq terapııa aldyńǵy qatarǵa shyǵady. Dál osy salalar adamnyń densaýlyǵyn jaqsartyp, ómirin aıtarlyqtaı uzartatyn bolady. Ondaı ózgeristerdiń ekonomıkalyq effektisi óte úlken bolady», - doktor Greı Astana ekonomıkalyq forýmynyń plenarlyq májilisinde.

Ǵalymnyń aıtýynsha, adamnyń ómiri uzarsa, zeınetkerlikke shyǵatyndardy áleýmettik qamsyzdandyrý jáne taǵy basqa shyǵyndar kóbeıedi. Halyqtyń tutyný kólemi de artady. Biraq dári-dármekke ketetin aqshanyń kólemi azaıady. Sebebi densaýlyqty saqtaýdyń jańa ádis-tásilderi bolady. «Bunyń barlyǵy 5-6 jyldan keıin kelýi ábden múmkin. Dál qaı kezde bolatynyn naqty aıtý qıyn. Biraq bir nárse anyq, bolashaqta adamdy jasartatyn medıtsına bolady. Atalǵan terapııalar adamzattyń ómirin túbegeıli ózgertedi. Adamnyń ómiri uzarady. Demek, qazirgi salyq tóleýshiler, jumysshylar, daýys berýshiler uzaq jasaıdy. Osyny oılaný qajet. Soǵan saı josparymyzdy da jasaýymyz qajet», - dep atap kórsetti Obrı Dı Greı.