Bolashaqtyqtar referendýmdy qoldaıdy!
ASTANA. 25 qańtar. QazAqparat - Astana qalasynda «Bolashaq» baǵdarlamasy túlekteriniń jalpy jınalysy ótkizildi. Onyń qorytyndysy boıynsha Qazaqstan Respýblıkasy Prezıdentiniń «Bolashaq» Halyqaralyq stıpendııasy stıpendıattary Qaýymdastyǵynyń «Qazaqstan-2020» Jalpyhalyqtyq demokratııalyq koalıtsııasyna qosylýy jaıly sheshim qabyldanyp, úndeý mátini daıyndaldy.
QazAqparat osynaý Úndeýdiń mátinin nazarlaryńyzǵa usynady.
Bolashaqtyqtar referendýmdy qoldaıdy!
Alǵashqy túlekteri tarapynan qurylǵan «Bolashaq» stıpendıattarynyń Qaýymdastyǵy 10 jyldan beri óziniń búkil qyzmetinde jastardy eldiń ornyqty damýy jolynda biriktire otyryp, Qazaqstan Respýblıkasynyń Prezıdenti Nursultan Nazarbaevtyń sara reformalaryna qaltqysyz qoldaý bildirip keledi.
Prezıdenttik baǵdarlamanyń nátıjesinde myńdaǵan qazaqstandyq stýdentter ozyq sheteldik ýnıversıtetterde bilim alyp qana qoımaıdy, sonymen qatar jańa álemmen etene tanys bola túsedi, óz eline ózge mádenıetter men qundylyqtar turǵysynan qaraý múmkindigine ıe bolady.
Damý jolynda qaryshty sekiris jasaǵan memleketterdiń tájirıbesi jeke tulǵanyń taǵdyrly ról atqara alatynyn dáleldeıdi. Konrad Adenaýer, Lı Kýan ıÝ, Franklın Rýzvelt, Kemal Atatúrik, Sharl de Goll, Mohamad Mahathır sııaqty zamanynan ozyp týǵan kóregen-kemeńger, aıryqsha qajyrly jáne tabandy kóshbasshylar óz halyqtaryn turaqty damýǵa, ósip-órkendeýge jáne baqýatty turmysqa jetkizdi.
Biz Elbasymyz Nursultan Nazarbaevtyń Qazaqstannyń Týyn buryn-sońdy bolmaǵan bıikke kóterip, mıllıondaǵan qazaqstandyqtyń júregine keleshekke degen nyq senim uıalatyp, álem tarıhyndaǵy kórnekti tulǵaǵa aınalǵanyn maqtanysh etemiz.
Táýelsizdigimizdiń nebary 20 jylynda bizdiń Prezıdentimiz Qazaqstandy eleýsiz elden álemdik qaýymdastyqtyń zor qurmetine bólengen qýatty memleketke aınaldyrdy. Búgingideı barynsha damyǵan elderdiń qataryna enýge naqty tarıhı múmkindik týyp turǵan shaqta bizdiń barshamyz orasan zor saıası tájirıbege, halyqtyń joǵary senimine jáne úlken halyqaralyq bedelge ıe Elbasynyń tóńiregine toptasýymyz kerek.
Sondyqtan «Bolashaq» Qaýymdastyǵy ótken senbidegi ashyq jıynynda «Qazaqstan - 2020» jalpyhalyqtyq koalıtsııasyna qosylýǵa jáne jastardy Qazaqstan Respýblıkasy Prezıdenti Nursultan Nazarbaevtyń ókilettigin uzartý jóninde referendým ótkizý bastamasyn qoldap, turaqtylyq pen ósip-órkendeý úshin sanaly tańdaý jasaýǵa shaqyrý týraly sheshim qabyldady, delingen Úndeýde.
