Bolashaqtyqtar «erekshe» balalarmen jumys isteıtin pedagogtar úshin arnaıy kýrs ázirledi
Bolashaqtyqtar 6 jyl ishinde 22 qalada 43 ınklıýzııany qoldaý kabınetin ashyp, jabdyqtady. Onda 284 pedagog-assıstent jumys isteıdi. Olar damý erekshelikteri bar 600 balanyń oqýyna, áleýmettenýine, óz betinshe bilim alýyna kómektesedi.
«Ár bala mektepke laıyqty» jobasynyń yqpalymen verbaldy emes balalardyń 90%-i sóıleýdi úırendi, al damý erekshelikteri bar 50 bala mektep, qalalyq, oblystyq jarystar men olımpıadalardyń júldegerleri atandy. 2000 maman men ata-ana ınklıýzıvti bilim berý jáne minez-qulyqty qoldanbaly taldaý boıynsha oqytýdan ótti.
Bolashaqtyqtardyń saraptamalyq qoldaýymen Nursultan Nazarbaev Qory elimizdiń 8 óńirinde taǵy 16 ınklıýzııany qoldaý kabınetin ashty.
«Bolashaq» qorynyń aıtýynsha, pedagog-assıstent laýazymy elimizdegi mektepterde tek ótken jyly ǵana resmı túrde paıda boldy. Bul rette pedagog-assıstentti mektepterdegi laýazymdar tizilimine engizý boıynsha jumys 2016 jyly «Dara» QQ, «Ashyq álem» QQ, «Dorogoıý dobra» QQ, «Qasıetti jol» QQ, «Rodnıkı» abılıtatsııalyq baǵdarlamalar ortalyǵy ókilderiniń, memlekettik organdardyń, Parlament depýtattarynyń jáne t.b. qatysýymen «Bolashaq» korporatıvtik qorynyń «Ár bala mektepke laıyqty» jobasynyń saraptamalyq keńesiniń jumysy sheńberinde bastaldy.
Pedagog-assıstent – ınklıýzıvti bilim berý júıesindegi aıtarlyqtaı mańyzǵa ıe býyn. Ol sabaqta jáne ınklıýzııany qoldaý kabınetinde oqý materıalyn meńgerýge kómektesedi, sondaı-aq, laıyqsyz minez-qulyqty túzetedi jáne balanyń boıynda áleýmettený jáne qarym-qatynas daǵdylaryn damytady.
Kóbinese damý erekshelikteri bar balalarda esirý, jylaý, qatty aıqaılaý jáne taǵy sol sııaqty jaǵymsyz minez-qulyq kezdesedi. Pedagog-assıstent aldymen balany osyndaı jaǵdaılarda ózin-ózi ustaı alýǵa úıretedi. 2020 jylǵa deıin pedagog-assıstentter basqa mamandardyń, atap aıtqanda, tárbıeshilerdiń, logopedterdiń, psıhologtardyń jáne taǵy sol sııaqty mamandardyń mólsherlemelerinde jumys isteýge májbúr boldy. Bir jyldan astam ýaqyttan beri pedagog-assıstentter mektep pedagogteriniń shtatyna resmı túrde qabyldandy. Osy ýaqyt ishinde olardyń ómirinde qandaı ózgerister boldy?
Máselen, pedagog-assıstent Zamzagúl Muqanova № 88 mektep-lıtseıdiń ınklıýzııany qoldaý kabınetinde 2019 jyldyń qarasha aıynda ashylǵannan bastap jumys isteı bastady. Odan bólek, ınklıýzııany qoldaý kabınetinde taǵy 8 assıstent-pedagog jáne kabınet muǵalimi jumys isteıdi. Olar aýtızmmen aýyratyn, aqyl-oı men sóıleýiniń damýy tejelgen, tserebraldy sal aýrýy, Daýn sındromy bar 10 balany oqytady.
Qazir Zamzagúl – ekinshi synyp oqýshysy Álibektiń pedagog-assıstenti. Ol ınklıýzııany qoldaý kabınetine 2020 jyldyń qyrkúıeginde keldi. Balada jaǵymsyz minez-qulyq baıqalyp, oqý daǵdylary durys bolmady. Inklıýzııany qoldaý kabınetine alǵash kelgende 5-10 mınýt ótkennen soń, ol úıge ketemin dep baıbalam salǵan. Bir jyl ótkennen soń Álibek Zamzagúldiń kómegimen qatarynan 5-6 sabaqqa qatysatyn bolǵan. Oqýdy jáne jazýdy úırenip, sabyrly bolyp, basqa oqýshylardyń mazasyn almaıtyn bolady. Onyń aıtýynsha, ár balanyń tilin durys taba bilý kerek.
«Pedagog-assıstent únemi fızıkalyq jáne emotsıonaldy túrde kúızeliste bolady. Kelesi mınýttarda ne bolatynyn bilmeısiń, óıtkeni bala sizdi túrtip ne uryp jiberýi múmkin. Ár balaǵa onyń dıagnozyna, daǵdylaryna, múmkindigine jáne minezine qaraı qarym-qatynas jasaısyń. Siz balamen dostasyp, onyń kóńil-kúıindegi ózgeristerdi sezinýińiz kerek. Erekshe qajettiligi bar balalarǵa daýys kóterip sóıleýge bolmaıdy. Erekshe qajettiligi bar balalarmen jumys isteıtin mamannyń pedagogıkalyq biliminen basqa, aldyn-ala boljaı alatyn, túrli jaıttarǵa daıyn bolý úshin túısigi de bolýy kerek», - deıdi pedagog-assıstent.
«Bolashaq» qorynyń jetekshisi Dınara Chaıjýnýsovanyń aıtýynsha, barlyq pedagog-assıstentter jeke baǵdarlamalar boıynsha jumys isteıdi. Olardy qordyń kýratory ázirleıdi. Erekshe balalarmen sapaly jumys jasaý úshin pedagogtardyń biliktiligin arttyrý maqsatynda arnaıy kýrs ashylǵan. Bul – Bilim mınıstrligi maquldaǵan ABA terapııasynyń birden bir kýrsy. Qazir Qazaqstannyń 15 óńirinen 1200-den astam maman bilim alýda. Alaıda, pedagog-assıstentterdiń shamadan tys júktemesiniń kóptigi jáne jalaqynyń tómendigi ózekti máselelerdiń biri bolyp tur.
«Jumys júktemesin esepteý boıynsha reglamentterdiń bolmaýyna baılanysty pedagog-assıstentterdiń jalaqysy kóbinese bilim basqarmalary men mektep dırektorlarynyń sheshimderine baılanysty bolady. Pedagog-assıstentterdiń 1 balany alyp júrgeni úshin ortasha jalaqysy keıbir óńirlerde bir aýysymda 35 myń teńgeni, al basqalarynda 80-90 myń teńgeni quraıdy. Pedagog-assıstentter arasynda jalaqynyń tómendigi men psıhoemotsıonaldyq júktemege baılanysty kadrlardyń jıi aýysýy baıqalady», – dep atap ótti ol.
Sondaı-aq, onyń aıtýynsha, pedagogıkalyq bilimi bar árbir maman pedagog-assıstent bola alady. Erekshe balalarmen jumys isteý boıynsha arnaıy bilim men daǵdylardy meńgerý qajet. Mektepte pedagog-assıstent tapqan jaǵdaılar bolady, biraq ol erekshe balalarmen jumys tájirıbesi joq jas maman bolyp shyǵady. Mundaı jaǵdaıda ınklıýzııa formaldy qalypta ǵana bolady, ıaǵnı pedagog-assıstent bar, biraq balanyń daǵdysy damymaıdy. Sondyqtan mektep ákimshiligi pedagog-assıstentterdi oqytý úshin jaqsy jaǵdaı men múmkindikter jasaýy mańyzdy.
Qorda atap ótkendeı, bul máseleniń sheshilýi «Nur Otan» partııasynyń baqylaýynda bolady.
