«Bolashaqtaǵy» kıkiljiń neden bastaldy
ASTANA. QazAqparat - "Halyqaralyq baǵdarlamalar ortalyǵy" AQ burynǵy qyzmetkeri Іlııas Tileýbergenovtiń aıtýynsha, "Bolashaq" baǵdarlamasyna taldaý júrgizilip, biraz máseleler anyqtaldy. Sonyń negizinde ortalyq jumysyna ózgeris engizý jóninde sheshim qabyldandy, dep habarlaıdy QazAqparat tilshisi.
"Biz arnaıy jobanyń aıasynda "Bolashaq" stıpendııasynan aıyrylýdyń sebepterin zerttegen bolatynbyz. Sebebi statıstıka boıynsha osy ýaqytqa deıin stıpendııaǵa ıe bolǵan 12 myń adamnyń ishinde bir myńdaıy oqýdy jarty jolda tastap ketti. Biz kelgende osy bir ózekti problema durys zerttelmegen edi. Sodan ortalyq basshysy Janbolat Jarylqasynulynyń tapsyrmasy boıynsha ony tereń zertteı bastadyq. Sóıtip, stıpendııadan aıyrylatyn adamnyń portretin jasap shyqtyq. Árbir adammen kezdesip, naqty sebepterdi anyqtadyq. Osynyń negizinde ortalyqtyń jumysyna ózgerister engizildi. Óıtkeni zertteý kezinde "Bolashaq" baǵdarlamasyn uıymdastyrý jaǵynan da birqatar kemshilikter anyqtaldy", - dedi Tileýbergenov búgin Astanada ótken baspasóz máslıxatynda.
Onyń aıtýynsha, "Halyqaralyq baǵdarlamalar ortalyǵy" AQ prezıdenti Janbolat Meldeshov sol zertteýdi negizge ala otyryp, "Bolashaq" baǵdarlamasyn jańǵyrtýdy qolǵa alǵan. "Bul - aıaq astynan qolǵa alynǵan bastama emes, naqty zertteýdiń nátıjesi. Endi, bas kezinde "Bolashaq" baǵdarlamasynyń keıbir tetikteri oryndy bolǵan shyǵar. Alaıda qazirgi kezde ol mexanızmder eskirdi. Sonyń bárin ózgertý kerek. Jańa basshylyqtyń maqsaty da sol", - dep atap kórsetti Tileýbergenov.
Osy oraıda joba jetekshisi "Bolashaq" ortalyǵynda tek stıpendııa túlekteri ǵana jumys isteıdi" degen taptaýryn bir túsinikten arylýǵa úndedi. Sebebi ortalyq qyzmetkerleri ishinde shetelde oqymaǵan adamdar da bar. Al "Bolashaq" baǵdarlamasyn jańǵyrtý jumystary kezinde til men biliktilikke tıisti talaptar qoıyla bastady. Jańa basshynyń ústinen shaǵym jazǵandar sol talaptardyń údesinen shyqpaı qalýy ábden múmkin.
Aıta keteıik, buǵan deıin «Halyqaralyq baǵdarlamalar ortalyǵy» AQ bir top qyzmetkeri ortalyq basshysy Janbolat Meldeshovtiń tarapynan zańǵa qaıshy áreket jasalǵany jáne dórekilik tanytqany úshin shaǵymdanǵan bolatyn. Buqaralyq aqparat quraldarynda sol jınalystyń vıdeosy da jarııalandy. QR Bilim jáne ǵylym mınıstrligi ortalyq qyzmetkerleriniń shaǵymyna baılanysty keshendi qyzmettik tekseris ótkizetindigin málimdedi. Tekseris nátıjeleri anyqtalǵansha "HBO" Prezıdenti Janbolat Meldeshov óziniń qyzmettik mindetterin oryndaýdan ýaqytsha shettetildi . Osydan keıin Meldeshov ortalyqtyń qyzmetkerleri tarapynan óz atyna aıtylǵan aıyptaýlarǵa qatysty pikir bildirgen bolatyn.
