Bolashaqta jumyssyz qalmaý úshin qandaı mamandyqtardy meńgerý kerek
ASTANA. KAZINFORM — Qazaqstanda 2 mıllıonnan astam jumys ornyn jasandy ıntellekt almastyrýy múmkin. Bul týraly Halyqty jumyspen qamtý departamentiniń bas sarapshysy Nysanbaı Sısen aıtty.
Mınıstrliktiń málimetinshe hatshydan bastap operator, tipti býhgalterge deıin — kúndelikti qujat pen málimet óńdeýmen aınalysatyn qyzmetter úlken qaýip aımaǵynda eken.
— Eńbek mınıstrligi JI salasyndaǵy jumysshy mamandarǵa qatysty taldaý júrgizdi. Esep-qısapqa jaýap beretin mamandyqtar tizimde kósh bastap tur, — deıdi Nysanbaı Sısen.
Dese de, mamandyq jabylady eken dep qol qýsyryp otyrýǵa bolmaıdy, — deıdi mamandar. Kerisinshe jańa paıda bolatyn qyzmetterdi meńgergen durys. Jańa mamandyqtar men osy baǵytta biliktilikti arttyrý kýrstary týraly tolyq aqparatty Skills Enbek platformasy arqyly bilýge bolady.
— Skills Enbek platformasy iske qosyldy. Atalǵan platformada bolashaqta paıda bolatyn nemese joıylatyn mamandyqtar boıynsha tıisti derekterdi tabýǵa bolady. Kez-kelgen QR azamaty qosymshaǵa tirkelip, ózine kerekti aqparatty ala alady, — dedi Halyqty jumyspen qamtý departamentiniń bas sarapshysy.
Al, qarjygerler jasandy ıntelektiden qorqýǵa bolmaıdy. Jumystyń barlyǵyn kompıýterlik júıe atqarǵanymen jasandy zeıin adamnyń ornyn basa almaıdy degen pikirde.
— Ózim 23 jyldyq tájirıbesi bar qarjy mamany retinde kez-kelgen júıeniń bir bóligin ǵana avtomattandyrýǵa bolady dep oılaımyn. Qaýip-qaterdi aldyn-ala boljap, kez-kelgen adam qosymsha tabys tabatyn joldardy qarastyrýy kerek. Aıtqym kelgeni ózgeristerden qoryqpaý kerek. Ol úshin izdenip, jańa dúnıelerdi meńgerip, bilimińizdi jetildirýge tyrysqan jón. Al, jasandy ıntellekt bizdiń qoǵamǵa tolyq enýi úshin áli shamamen 5 jyldaı ýaqyt qajet. Osy ýaqyt aralyǵynda kóptegen mamandyqty meńgerip alýǵa bolady, — deıdi qarjy salasynyń mamany Ásel Jarasqalıqyzy.
Buǵan deıin elimizdegi JOO-da atom salasyna qatysty jańa mamandyqtar ashylatyny týraly jazǵan bolatynbyz.