Bolashaqta ýnıversıtetter qalaı ózgeredi
"Bolashaqta árbir úsh jyl saıyn oqý baǵdarlamasyn qaıta qaraýǵa týra keledi. Sebebi sabaqtardyń bári 10 mınýttan aspaıdy. Barlyǵy onlaın rejımde ótedi. Ýnıversıtetti qurý da qıynǵa túspeıdi. Óıtkeni oqýlyqtar, kitapxanalar, tipti zertxanalar elektrondy formatta jumys isteıdi. Stýdentterge tsıfrlyq júıemen baǵa qoıylady. Kóp nárse blokcheınge negizdeledi. Sosyn keleshekte ýnıversıtetti bitirgen jas maman alty aıdyń ishinde jumys tappasa, joǵary oqý orny onyń oqýǵa jumsaǵan aqshasyn qaıtarýǵa májbúr bolady", - dedi D.Salmı joǵary bilim berý kóshbasshylarynyń forýmynda.
Sarapshynyń oıynsha, memlekettik ýnıversıtetterdi bıýdjet tarapynan qarjylandyrý kólemi azaıýy ábden múmkin. Alaıda osy sanattaǵy joǵary oqý oryndary jeke menshik qarajatty kóptep tartatyn bolady. Sonyń arqasynda rektorlar men ǵalymdardyń jalaqysy ósedi.
"Degenmen, qarjynyń kólemi de, jalaqynyń mólsheri de reıtıngke baılanysty bolady. Túlekterdiń jumysqa turý kórsetkishi joǵary bolsa, abıtýrıentter de kóp keledi. Demek, aqsha da túsedi. Sonda úzdik professorlar Premer-mınıstrden de artyq aqsha alýy ábden múmkin. Sosyn MVA bilimniń sapasyn anyqtaıtyn dárejeden aıyrylady. Barlyǵy kreatıvti oılaý qabiletine baılanysty bolady. Qazirgi ýnıversıtetter oǵan daıyn ba? Osyny oılaýymyz qajet", - dep atap kórsetti D.Salmı.
Aıta keteıik, búgin Nazarbaev ýnıversıtetinde joǵary bilim berý kóshbasshylarynyń VII Eýrazııalyq forýmy (EHELF) bastaldy. Bıylǵy forým joǵary bilim berý salasyndaǵy ınnovatsııalarǵa arnalyp otyr. Halyqaralyq sharaǵa otandyq jáne sheteldik ýnıversıtetterdiń ǵalymdary, top-menedjerler men strateg mamandar jınaldy. Olardyń ishinde Reseı, Rýmynııa, AQSh, Qyrǵyzstan, Qytaı, Avstralııa jáne taǵy basqa joǵary oqý oryndarynyń ókilderi bar. Eki kúndik májilis kezinde forým qatysýshylary ozyq texnologııalar arqyly bilim berý salasyn jańǵyrtý máselelerin talqylaıdy.