Bolashaqta «Úlken dýlyǵa» týrnırinde jeńiske jetkim keledi– Zańǵar Nurlanuly
NUR-SULTAN. QazAqparat – 13 jastaǵy Zańǵar Nurlanuly – Qazaqstannyń bolashaǵynan úlken úmit kúttiretin jas juldyzdarynyń biri. Qazirgi kezde Zańǵar Tennis Europe (TE) jasóspirimder reıtıngisinde kósh bastap keledi. Jekeleı synda Eýropadaǵy bes birdeı týrnırde jeńimpaz atanǵan jas tennısshi QazAqparat tilshisine balalyq shaǵy, tennıstegi joly týraly áńgimelep berdi.
-Zańǵar, tennıske qalaı keldiń?
-Men Almatyda ómir esigin ashtym. Tórt jasymnan tennıspen aınalysa bastadym. Bizdiń mekteptiń aýlasy men sport zalda aǵashtan jasalǵan korttar boldy. Bastapqyda ákem meni úıretip, tennısshi bolýymnyń negizin qalady.
-Kúni búgin Slovakııadaǵy belgili tennısshi Domınıka Tsybýlkovanyń akademııasynda jattyǵýdasyń. Eýropalyq ádistemeniń Qazaqstandaǵydan aıyrmashylyǵy bar ma?
-Iá, Domınıka akademııasyndaǵy jattyǵý bazasyna aptasyna eki ret baryp, sheberligimdi ushtaımyn. Qalǵan ýaqytta jarystarda júremin. Eýropada TE serııasy boıynsha ótetin týrnırler kóp. Saıysqa túskendi unatamyn. Qandaı ereksheligi bar degenge kelsek, pálendeı ózgeshelikti baıqamadym. Tennıs korttary da barlyq jerde birdeı. Tek durys jumys jasaý qajet, qazaqstandyq mekteptiń túlegi ekenimdi umytpaımyn.
-Qazirdiń ózinde TE serııasy boıynsha jekeleı synda bes týrnırdi utyp aldyń. 2021 jyldyń ortasynda 14 jasqa deıingiler arasynda Eýropa reıtıngisinde 150-orynda ediń. Mine, endi jalpy esepte tórtinshi, chempıondyq kestede birinshi orynda kelesiń. Munyń syry qandaı?
-2020 jyly Eýropa reıtıngisinde 500-satyda edim, bir jyldan keıin 150-orynǵa kóterildim, qazir úzdik bestiktemin. Eýropa týrnırlerin uıymdastyrýshylar tek óz oıynshylaryna arnaıy shaqyrtý jiberedi. Sondyqtan negizgi dodaǵa ótý úshin irikteý saıystaryna qatysýǵa týra keletin. Kóbirek upaı jınap, jeńis tuǵyryna kóterilý ońaıǵa túsken joq. Munyń bári kúsh-jiger, tabandylyq, eńbek pen tártiptiń jemisi der edim.
-Jarystarda ózińmen birge kim júredi?
-Ákem! Ol ár ýaqytta janymda. Bapker de, júrgizýshi de, menedjer de, psıholog ta, jigerlendirýshi de ákem. 2022 jyldyń basynan beri meni Qazaqstan tennıs federatsııasy, onyń prezıdenti Bolat Ótemuratov qoldap keledi. Ol kisi týrnırlerdegi tabystarymnan soń qońyraý shalyp, quttyqtaıdy. Federatsııa prezıdentiniń qoldaýy nátıjesinde Qazaqstanda barlyq óńirlerde tennıs damyp keledi. 12, 14, 16 jáne 18 jastaǵy tennısshiler de muny sezinýde.
Ákemniń qasymda bolýy maǵan kóp kómektesedi. Biz bir-birimizdi aıtpaı-aq túsinemiz.
-Qandaı tósenishtegi kortta jaqsy oınaısyń?
-Hardta da, topyraq tósenishinde de birdeı oınaımyn.
-Instagram jelisinde belsendisiń. Bul ne beredi, óz aýdıorııańmen pikirlesken unaı ma?
-Buryn belsendi boldym, keıingi kezde aptasyna bir-aq ret kiremin. Kópshiligi aqyl-keńes suraıdy, jaýapsyz qaldyrý yńǵaısyz, barynsha jaýap qaıtarýǵa tyrysamyn. Shynyn aıtsam, oǵan ýaqyt ta joq. Jattyǵý men jarystan basqa oqýym bar, shahmat ta oınaımyn.
-Seniń paraqshańa Qazaqstannyń birinshi raketkasy Elena Rybakına men onyń bapkeri Stefano jazylǵan. Olarmen baılanys ustap turasyń ba, oıyndy jaqsarta túsý úshin aqyl-keńesterin aıta ma?
-Elena men Stefano – jaqsy komanda. Olardyń tabystaryna únemi qýanyp otyramyn. Stefano – tamasha bapker, árqashan bilgenin aıtyp otyrady, sol úshin alǵysymdy aıtamyn.
-Sáýir aıynda Úndistanda jasóspirimder arasyndaǵy álem chempıonatyna irikteý jarysy ótedi. Oǵan daıynsyń ba?
-El namysyn qorǵaý – úlken qurmet, sonymen birge jaýapkershilik júgi aýyr. Kortqa shyqqan soń, namysty qoldan bermeý kerek. Men óz elimniń patrıotymyn, Qazaq elin sheksiz jaqsy kóremin. Álem chempıonatymen teń sanalatyn «Úlken dýlyǵa» týrnırin utý – armanym. Tennıstiń arqasynda elimniń atyn búkil álemge jaıǵym keledi.
-Zańǵar, áńgimeńe rahmet, sporttyq jolyńda tek tabys tileımiz.
