Bolashaqta turǵyndar úılerinen shyqpaı-aq sot qujattarymen tanysa alatyn bolady

ASTANA. QazAqparat - Bolashaqta turǵyndar úılerinen shyqpaı-aq ınternet arqyly sot qujattarymen tanysa alatyn bolady. Bul týraly búgin QR Joǵarǵy Soty respýblıka sottarynyń ınternet-resýrstary arqyly azamattar men uıymdardyń sot organdarymen elektrondy ózara is-qımylynyń jańa jobalaryn tanystyrý barysynda QR Joǵarǵy Soty janyndaǵy Sottardyń qyzmetin qamtamasyz etý departamentiniń basshysy Іlııas Ispanov málimdedi.

«Іske qosylǵaly otyrǵan jobalar azamattardyń sot aqparatyna qoljetimdiligin qamtamasyz etedi. Júzege asatyn aqparattyq qyzmetterdiń arqasynda turǵyndar óz úılerinen shyqpaı-aq ınternetti qoldaný arqyly sot qujattarymen tanysa alady», - dep atap ótti ol.

Onyń aıtýynsha, jańa elektrondyq jobalardyń iske qosylýy poshtalyq shyǵynǵa jumsalatyn bıýdjet qarajatyn únemdeýge múmkindik beredi. Statıstıkalyq derekter boıynsha, respýblıka sottary 2012 jyly - 580 105 talap-aryz, 2013 jyly - 643 683 ótinish qabyldasa, 2014 jyldyń 5 aıynda 282 myńnan astam aryz qabyldaǵan. Árbir aryz boıynsha joldanatyn poshtalyq habarlandyrýlar birshama qarjy talap etedi.

«Sot qujattarymen tanysý» servısi logın, parol, JSN-di engizý arqyly elektrondy sot qujattaryn kórýge arnalǵan. Logın men paroldi sot úderisine qatysýshy azamat óziniń uıaly telefonyna nemese elektrondy poshtasyna kelip túsken elektrondy habarlama arqyly bile alady», - dep túsindirdi І. Ispanov.

Departament basshysynyń aıtýynsha, joldanǵan ótinishi tirkelgennen keıin azamattar onyń tirkelgeni týraly talon men elektrondy habarlamalar týraly kelisimge ıe bolady. Sot protsesine qatysýshy ózge taraptarǵa da sot tyńdalymy týraly talon joldanady.

«Sosyn jedel aqparattandyrý maqsatynda sot protsesine qatysýshylarǵa sýdıanyń elektrondy-tsıfrlyq qoltańbasy qoıylǵan sot aktileriniń shyqqany týraly SMS jiberiledi. Servıstegi elektrondy sot qujattaryn kórýge, saqtaýǵa jáne júktep alýǵa bolady», - dedi departament basshysy.

Sondaı-aq, onyń aıtýynsha, sot otyrysy hattamasynyń sapasyn arttyrý maqsatynda barlyq sottarda sot protsesin aýdıobeınetirkeý (ABT) júıesi engizilýde. Qazirgi tehnologııalar negizinde sot protsesterin elektrondyq hattama túsirýge múmkindik beretin júıe óz kezeginde «Sot kabıneti» arqyly sot protsesine qatysýshylarǵa qoljetimdi bolyp tabylady.

«ABT sheńberinde shet memleketterdiń tájirıbesine súıene otyryp, sot zaldaryn beınekonferents júıesimen jabdyqtaý arqyly sot tóreligin qashyqtyqtan júzege asyrý múmkindigi artady. Osy jobanyń iske asýy qylmystyq atqarý júıesin sottalýshyny alyp júrý júktemesinen bosatýǵa, al sottalýshynyń beınekonferents arqyly ustalǵan jerinde aıǵaq berýine múmkindik beredi», - dedi І. Ispanov.