Bolashaqta «Oqjetpes» brendimen álemge tanylsaq degen nıetimiz bar — Aıan Aqmurzın
ASTANA. KAZINFORM — Uly dalada ómir súrgen halqymyzdyń dástúrli tirshilik daǵdysy, ómir salty tabıǵatpen tyǵyz baılanysty. Al Qazirgi adamdar da densaýlyqqa paıdaly osyndaı tabıǵat aıasynda demalyp, serýendeýdi unatady.
Qaraǵaıly ormanda taza aýamen tynystap, shıpaly tunyq sýdan qýat alyp, qustary saıraǵan taýda serýen-seıil quratyn ondaı jaıly mekendi QR Prezıdent Іs basqarmasy medıtsınalyq ortalyǵyna qaraıtyn «Oqjetpes» emdeý-saýyqtyrý kesheninen kóresiz. Jyl ótken saıyn keńeıip, kemeldenip, alys-jaqynǵa dańqy shyǵyp jatqan teńdesiz kýrort Býrabaıda ornalasqan «Oqjetpes» emdeý-saýyqtyrý kesheniniń basqarýshy dırektory Aıan Aqmurzınnen otandyq shıpajaıdyń qazirgi jaı-kúıi, jumys baǵyty, bolashaq josparlary týraly keńirek keńesip bildik.
— Aıan myrza, «Oqjetpes» shıpajaıy qonaqtaryna qandaı em jasap sergitip, densaýlyǵyn ońaltýǵa kómektesedi?
— «Oqjetpes» emdeý-saýyqtyrý kesheniniń irgetasy qalanǵanyna bıyl 60 jyl tolady. «Oqjetpes» keshenindegi qazirgi zamanǵy emdeý-dıagnostıkalyq bazamen tolyqtyrylǵan tabıǵı biregeı faktorlar: qaraǵaı ormanynyń ekologııalyq taza aýasy, Balpash sor kóliniń emdik balshyǵy jáne Maı Balyq kóliniń mıneraldy sýy, radondy terapııa, «Qulager — Arasan» mıneraldy sýy júrek-tamyr júıesi, tynys alý músheleri, tirek-qımyl apparaty, asqorytý, qan aınalymy jáne júıke júıesi aýrýlaryn, ýrologııalyq jáne gınekologııalyq aýrýlardy emdeýge jáne ońaltýǵa múmkindik beredi.
Mysaly, Balpash sor kóliniń balshyǵy tirek-qımyl júıesi aýrýlaryn, artrozdy, artrıtti, omyrtqa osteohondrozyn emdeýge kómektesetin bıologııalyq belsendi balshyq bolyp esepteledi. Bul tirek-qımyl apparatynyń aýrýlaryn emdep qana qoımaı, qabynýǵa qarsy áser etedi. Shıpajaıdyń sý emhanasynda vannanyń bes túri sý massajy, qylqan japyraqty vanna, tórt kameraly vanna men mıneraldy vanna bar. Sonymen birge mıneraldy sý ıngalıatsııasy, dárilik zattar ıngalıatsııasy jáne shóp tunbalar ıngalıatsııasy sekildi túrli ıngalıatsııalar da jasalady. Dárigerdiń nusqaýy boıynsha kelýshiler shóp tunbalarynan buqtyrylǵan sháı túrlerin, ottegi kokteılderin ishe alady.
Sondaı-aq, kelýshiler arasynda buǵy múıizinen alynatyn panta terapııasyna suranys joǵary. Jalpy álemde buǵynyń múıizi men qany emdik maqsatta keńinen qoldanylady. Sol pantoterapııanyń arqasynda ımmýnıtet jaqsaryp, deneniń ártúrli ınfektsııalarǵa tózimdiligi artady.
— Qazaqtyń uly dalasyndaǵy «Oqjetpes» kesheni qonaqtarǵa ulttyń salt-dástúrin, bolmysyn nasıhattaýǵa baǵyttalǵan «Qazaq nomad» jobasyn da jasap shyǵypty…
— Biz qazaq mádenıetin, dástúrlerin qyzmetimizge, tamaq mázirine, bólmelerdi naqyshtaýǵa paıdalandyq. Kól jaǵasynda, orman ishimen serýendeıtin jaıaý júrginshiler súrleýi bar. Sol jolmen júrgen demalýshylar 100 metr saıyn ornatylǵan ár taqtaıshalardan «Qozy Kórpesh-Baıan sulý» lıro-epostyq jyrynyń úzindilerin oqyp nemese aýdıo nusqasyn da tyńdaı alady. Sondaı-aq, tamaq mázirine de qymyz, baýyrsaq, jent sekildi densaýlyqqa paıdaly ulttyq taǵamdar qosylǵan.
Sonymen birge kelýshiler kıiz úıdiń shıpaly aýasymen tynystap, tátti, syrly saryndy qazaq kúılerin tyńdap sanasyn sergitip, rahattanyp demalady. Budan bólek arnaıy daıyndalǵan alańda sadaq atyp, qazaqtyń jaýyngerlik rýhyn sezinip, serpilip, sergıdi. Osylardyń barlyǵy bizdiń em alýshylardyń, ásirese sheteldik qonaqtardyń erekshe yqylasyn oıatyp, qyzǵýshylyǵyn týdyrdy. Biz osylaısha alys-jaqynan kelgen qonaqtarymyzǵa halqymyzdyń salt-dástúrin, bolmysyn nasıhattaı otyryp, densaýlyqtarynyń da ońalýyna kómektesemiz.
— Endi «Oqjetpes» emdeý-saýyqtyrý kesheniniń jetistikteri, bolashaq josparlary týraly aıtsańyz?
— Býrabaıdaǵy bul shıpajaıdyń 1965 jyly jumysyn bastaǵannan bergi shejiresine qarasańyz úzdiksiz damyp, kemeldenip, ósip otyrǵanyn kóresiz. Al, sońǵy jyldardaǵy jetistikterine sholý jasasaq, 2006 jyly Andorrda Dúnıe júzilik sýmen jáne klımatpen emdeý federatsııasynyń Bas Assambleıasymen sanatorııalyq-kýrorttyq emdeýdi uıymdastyrýdaǵy jetistikteri jáne Dúnıejúzilik densaýlyq saqtaý uıymdarynyń arasynda belsendi ǵylymı jumystary úshin «Oqjetpes» ESK-ne «Álemdegi eń úzdik kýrort» marapaty tabys etildi.
2011 jyly sanatorıı menshikti bulaqtyń radondy sýyn paıdalaný arqyly jańa medıtsınalyq qyzmet kórsetý — radondy terapııany engizdi. 2012 jyly mamyrda Londonda (Ulybrıtanııa) Brıtan ınstıtýty dırektorlarynyń sheshimimen bizdiń emdeý-saýyqtyrý kesheni «Eýropalyq sapa» halyqaralyq marapatqa ıe boldy. 2019 jyly «Úzdik shıpajaı» marapatyna ıe bolyp, Qazaqstan shıpajaılary arasynda alǵash EuroSpa sertıfıkatyna ıe boldy. «Oqjetpeste» halyqaralyq standarttarǵa sáıkes sapa menedjmentiniń júıesi bar. 2014 jyly jyl saıyn rastaıtyn «4 juldyzdy qonaq úı» jáne «Joǵary sapaly meıramhana» sanatyna sáıkestik sertıfıkatyn aldy.
2017 jyldyń 27 shildesinen bastap, Qazaqstan Respýblıkasy Prezıdenti is basqarmasy medıtsınalyq ortalyǵynyń emdeý-saýyqtyrý keshenderi «Oqjetpes» brendimen biryńǵaı jelige birigip, quramyna Býrabaı kýrorttyq aımaǵyndaǵy «Oqjetpes», Almaty qalasyndaǵy «Almaty Resort» jáne RF Essentýkı kýrort-qalasyndaǵy «Qazaqstan» shıpajaıy kirdi.
Qazirgi ýaqytta QR Prezıdenti is basqarmasy medıtsınalyq ortalyǵy bizdiń elimizdiń eń jaqsy kýrorttaryn biriktirý úrdisin odan ary jalǵastyryp Qyrǵyzstannyń Ystyq kólindegi «Qazaqstan» shıpajaıyn jańartý boıynsha jumystardy bastap ketti. Osy ortalyq aldaǵy 4-5 jylda tolyq jasalyp, jabdyqtalyp, eń jańa kemeldi keshenge aınalady dep otyrmyz. Sonymen birge, Saryaǵashta shıpajaı salý nemese jańartý jobasy josparlanǵan. Al Shyǵys Qazaqstan oblysyndaǵy Tarbaǵataı taýlarynyń qoınaýyndaǵy shıpajaıdy da bizdiń balanysqa ótkizý jumystary júrip jatyr. Budan basqa Býrabaı taýlarynda osydan 4 jyl buryn salynǵan «Aq býra» kesheni de jyl sońyna deıin bizdiń ortalyqtyń quramyna kiredi dep otyrmyz. Bolashaqta osyndaı 6-7 emdeý-saýyqtyrý keshenin biriktirip úlken ortalyqqa aınalyp, ult densaýlyǵy úshin sapaly jumys jasap, «Oqjetpes» brendimen álemge tanylsaq degen nıetimiz bar.
— Osyndaı aýqymdy jumystyń barysyn baıandap áńgime órbitkenińizge raqmet! Bolashaqtaǵy irgeli isterińiz jemisti bolsyn!
