Bolashaqta qurylys salasynda qandaı mamandyqtar joıylýy múmkin
NUR-SULTAN. QazAqparat - 2030 jylǵa qaraı syzba jasaýshylar, metall pisirýshiler, armatýrashylar, syrlaýshylar jáne ózge de mamandar qajet etilmeýi ábden múmkin. Bul týraly QazAqparat Energyprom.kz saıtyna silteme jasap habarlaıdy.
Daǵdarys jaǵdaıynda Qazaqstanda ósim tanytyp otyrǵan salalardyń biri qurylys bolyp tabylady. 2020 jylǵy qańtar-qazan aılarynda sektordaǵy óndiris pen qyzmet kórsetý kólemi ótken jyldyń osyndaı kezeńimen salystyrǵanda 10,7 paıyzǵa ósken.
Aǵymdaǵy jyldyń úshinshi toqsanynda qurylys salasynda 621,8 myń adam nemese respýblıkanyń eńbekke qabiletti turǵyndarynyń 7,1 paıyzy jumys istedi. Eldegi ekonomıkalyq belsendiliktiń tómendeýine baılanysty, bir jyldyń ishinde jumys isteýshilerdiń sany 3,1 paıyzǵa qysqarǵan.
Búginde qurylys salasynda jańa tehnologııalar óńdelip, jyldam qarqynmen engizilý ústinde. On-jıyrma jyl buryn bolashaq tehnologııasy bolyp kóringenniń kóbin búginde álem boıynsha qurylys alańdarynan kórýge bolady. Tıisinshe, jańa mamandyqtar men kadrlarǵa degen qajettilik týyndap, burynǵy mamandyqtardyń qajettiligi azaıyp keledi.
Qazaqstannyń jańa mamandyqtar men quzyretter atlasynyń málimetinshe, 2035 jylǵa qaraı qurylys sektorynda 16-dan astam mamandyq joıylyp ketýi múmkin. Osylaısha, mysaly, 2025 jylǵa qaraı syzbashy mamandyǵy joıylýy múmkin. Qurylys nysandaryn jobalaý, sodan keıin nysandy salý úshin qajetti quramdastardy óndirý aldaǵy bolashaqta tsıfrlyq jáne addıtıvtik tehnologııalar kómegimen tolyq júzege asyrylatyn bolady.
2030 jylǵa qaraı kelesi mamandyqtar joıylady: shatyrshylar, óńdeýshiler, sylaqshylar, pisirýshiler, gazdyq keskishter, armatýrashylar, qaptaýshylar jáne t.b. Al 2035 jylǵa qaraı qurylysshy montajdaýshy, qurylys syrlaýshysy, syrshy, syrlaýshy jáne taǵy basqa mamandyqtar joıylady.
