Bolashaqta Qostanaı aýmaǵynda AES salynýy múmkin - Sátqalıev
ASTANA. KAZINFORM - Atom energetıkasy jónindegi agenttik tóraǵasy Almasadam Sátqalıev atom elektr stansasyn salýǵa laıyqty alańdardy atady.
- Qazaqstannyń elektr energetıkalyq jelileriniń damýyn eskere otyryp, keminde 3, al keleshekte 4 atom elektr stansasyn salý qajet dep esepteımiz. Qazirgi ýaqytta keleshegi bar alańdardyń barlyǵyn barynsha baıyppen zerdelep shyqtyq. Boljamdy energetıkalyq teńgerim, ekologııalyq, seısmıkalyq qaýipsizdik talaptary turǵysynan Qazaqstanda atom energetıkasy úshin birneshe biregeı alań bar. Birinshisi – Balqash mańy alańy. Ol jer 6 iri energetıkalyq blokqa deıin salýǵa múmkindik bere alady. Kýrchatov bar, múmkin shaǵyn jáne orta qýatty atom reaktorlaryn damytý úshin barynsha áleýetti alań bola alady, - dedi agenttik tóraǵasy Aqordada BAQ ókilderiniń saýalyna oraı.
Ol AES qurylysy úshin laıyqty oryndardyń taǵy biri retinde Batys Qazaqstandy atady. Onyń aıtýynsha, bul óńirde energetıkalyq qondyrǵy jumys istep, tek elektr energııasyn ǵana óndirip qoımaı, jylý, sýdy ysytý jáne sýdy tushytý úshin paıdalanyldy.
- Degenmen Qazaqstanda basqa da alańdar bar. Qazirgi ýaqytta olardy zerttep jatyrmyz. Energııa balansyna baılanysty múmkin endi 20-30 jyldan keıin Qostanaı alańy qarastyrylýy múmkin. Ol jer de Qazaqstandaǵy atom stansasy qurylysy úshin bolashaǵy bar oryn bola alady, - dedi Almasadam Sátqalıev.
Buǵan deıin atom energetıkasyn damytý aıasynda AES qurylysy boıynsha arnaıy quzyretter ortalyǵyn ashý josparlanǵanyn jazǵan edik.
