Bolashaqta kez kelgen shyny energııa kózine aınalýy múmkin
ALMATY. QazAqparat - Bolashaqta kez kelgen shyny terezeni, smartfonnyń, planshettiń, teledıdardyń, tipti kompıýter monıtorynyń ekranyn qosymsha elektr energııasy kózine aınaldyrýǵa bolady. Bul jerde shynynyń beınelik sapasyna eshqandaı nuqsan kelmeıdi.
Mıchıgan shtaty ýnıversıtetiniń (AQSh) bir top zertteýshi ǵalymdary osyndaı tujyrymǵa keldi, dep habarlaıdy sheteldik BAQ.
Olar móldir kún «batareıalaryn» jasaý máselesine múldem basqa turǵydan kelipti. Ǵalymdar birinshiden, qalyń shynynyń ishine fotouıashyqtar ornatýdan bas tartqan. Bul árıne bir qaraǵanda tipti aqylǵa qonymsyz kórinedi. Alaıda bar qupııa osynda: olar ázirlegen organıkalyq móldir materıal kún sáýlesiniń spektrin ótkizip, ózine jaqyn ınfraqyzyl jáne ýltrakúlgin tolqyndardy ǵana sińiredi. Al sińirip alynǵan energııany móldir shynynyń aınala jıeginde ornalasqan kádimgi fotouıashyqtar qabyldaıdy. Ázirge kún energııasyn sińirip, ony elektr qýatyna aınaldyratyn tájirıbelik móldir shynylardyń paıdaly áser koeffıtsıenti 1 paıyzdan aspaıdy (kádimgi kún panelderiniń paıdaly áser koeffıtsıenti - 9-24 paıyz). «Degenmen, bul ýaqyt enshisinde - deıdi ǵalymdar, - Eń bastysy, panelder - móldir». Olar bul kórsetkishte 5-10 paıyzǵa arttyrmaq. Eger bul oılary júzege asar bolsa, bolashaqta kez-kelgen móldir shynyny, terezeni, smartfon, telefon, planshet, teledıdar, tipti kompıýter ekranyn qosymsha energııa kózine aınaldyrýǵa bolady. Aıta ketelik, qazirgi tańda álemde móldir kún batareıalaryn jasaý jolynda jappaı zertteýler júrgizilýde.
