Bolashaqta Qazaqstanda sý tapshylyǵy qaýpi bar
ASTANA. QazAqparat - 2040 jylǵa qaraı Qazaqstandaǵy sý resýrstarynyń tapshylyǵy jylyna 12 tekshe shaqyrymdy quraıdy.
Bul týraly QR QOSRM baspasóz qyzmeti habarlady.
Aıta keteıik, 2014 jyly 4 sáýirinde Qazaqstan Respýblıkasy Prezıdentiniń №786 Jarlyǵymen Qazaqstannyń 2014 - 2020 jyldarǵa arnalǵan sý resýrstaryn basqarý memlekettik baǵdarlamasy bekitildi.
Osy oraıda álemniń 30 damyǵan elderi qataryna qosylý strategııalyq maqsatyn ustanǵan Qazaqstan sý resýrstaryn basqarýdaǵy memlekettik saıasatty júrgizýdiń jańa tásiline kóshedi. Aldymen baǵdarlamanyń basty baǵyttary boıynsha eń tıimdi bastamalar iske asyrylmaq. Memlekettik baǵdarlama sý resýrstaryn utymdy paıdalanýdy yntalandyrý tetigin iske qosady. Mysal úshin, aýyl sharýashylyǵy salasynda sý tutyný mólsherin azaıtý úshin ósiriletin daqyldar quramy ózgertilip, aýyl sharýashylyǵy alqaptary men sýlandyrý ınfraqurylymynyń jaǵdaıy, qoldanystaǵy sýarý tásilderi, aýyl sharýashylyǵyn júrgizý tájirıbeleri zerttelmek. Sonymen qatar ınfraqurylym qalpyna keltirilip, jer óńdeý men sýarýdyń zamanaýı tehnologııalary engiziledi.
«Baǵdarlamada transshekaralyq ózender sýlarynyń ádiletti negizde bólinýine baǵyttalǵan sharalardy iske asyrý qarastyrylǵan. Bulardyń qatarynda kelissóz júrgizetin toptardy kúsheıtý, boljamdar qurastyrý, kelissózder júrgizý strategııasyn daıyndaý, transshekaralyq sýlardyń monıtorıngi ınfraqurylymyn qurý, transshekaralyq sýlar boıynsha kelisimderdi bekitý jumystary bar»,-delingen mınıstrlik málimetinde.
Memlekettik baǵdarlama usynǵan is-sharalardy iske asyrý nátıjesinde elimizde jylyna 9,5 tekshe shaqyrym sý únemdelýin kútýge bolady. Olardyń alǵashqy 2,6 tekshe shaqyrymy (nemese 2040 jylǵa boljamdalǵan sý tapshylyǵynyń 21%) sý tarıfterin ósirmeı, ózin ózi óteıtin sharalardy júrgizý arqyly únemdelmek. Tıisinshe, ózin ózi óteıtin sharalar sý tarıfterin ósirýmen qatar júrgizilgen jaǵdaıda, únemdelgen sý mólsheriniń de ulǵaıýyna sebep bolady.
Baǵdarlamada kózdelgen barlyq baǵyttardyń iske asyrylýy qomaqty qarjynyń jumsalýyn talap etedi. Olardy júzege asyrý úshin qajetti qarjy resýrstary respýblıkalyq jáne jergilikti bıýdjetterden, tarıftik tólemderden, syrtqy nesıeler men granttar, sondaı-aq jeke ınvestıtsııalar esebinen jınaqtalady. Qarastyrylyp otyrǵan bastamalardy iske asyrýda qarjylandyrý kózderi men olardyń úlesteri birkelki bolmaıdy.
2014 - 2040 jyldar aralyǵyndaǵy qarjylandyrýdyń baǵalanǵan eseptik mólsheri 8,2 trln. teńgeni quraıdy. Onyń 5,4 trln. teńgesi respýblıkalyq jáne jergilikti bıýdjetterden bólinse, qalǵan 2,8 trln.teńge bıýdjetten tys kózderden tartylmaq.
Qazirgi ýaqytta QR qorshaǵan orta jáne sý resýrstary mınıstrligi Elbasy Jarlyǵyna sáıkes ázirlegen memlekettik baǵdarlamany júzege asyrý boıynsha is-sharalar jospary memlekettik organdarda qaralyp jatyr.
