Bolashaqta «Qazaqstan barysy» týrnıri halyqaralyq deńgeıge shyǵýy múmkin
ASTANA. 4 aqpan. QazAqparat - «Qazaqstan barasy» týrnırin halyqaralyq deńgeıge kóterý qajet.
Mundaı pikirdi búgin Astanada ótken baspasóz máslıhatynda QR Sport jáne dene shynyqtyrý isteri agenttigi tóraǵasynyń orynbasary Elsııar Qanaǵatov aıtty.
Onyń aıtýynsha, qazaq kúresinen ótetin jarystyń oblystyq, respýblıkalyq deńgeıde uıymdastyrý jumystary jaqsylap qolǵa alynyp, joǵary deńgeıde ótkizilip kele jatyr. Endigi kezekte aýyldyq jáne aýdandyq deńgeıdegi irikteý jarystaryn damytý qajet.
«Agenttik oblystyq basqarmalarǵa, aýdandaǵy bólimderge nusqaýlyq berip, osy jarysqa erekshe kóńil bólý kerektigi aıtyldy. Sondyqtan da qanymyzǵa sińgen, elimiz, halqymyz jaqsy kóretin ulttyq sport túriniń deńgeıi joǵary bolýy úshin bárimiz birigip jumys jasaýymyz qajet», - dedi ol.
Sondaı-aq, E. Qanaǵatovtyń aıtýynsha, «Qazaqstan barysy» respýblıkalyq týrnıriniń bas demeýshisi «Samuryq-Qazyna» UÁQ qazaq kúresin damytý boıynsha birshama usynystar ázirlegen kórinedi.
«Qazaqstan barysyn» halyqaralyq deńgeıde ótkizý jobasy daıyndalyp jatyr. Sheteldegi qandastarymyzdyń arasynda ótkizý máselesi de kóterilýde. Nege deseńiz, qazaq kúresi tek qana respýblıkalyq deńgeıde emes, halyqaralyq deńgeıde ótkizýge de laıyqty sport túri. Ózderińiz bilesizder, biz respýblıkalyq federatsııalardyń arqasynda Álem jáne Azııa chempıonattaryn ótkizýdemiz. Sondyqtan bolashaqta munyń («Qazaqstan barysynyń» - avtor) deńgeıin áli de joǵary deńgeıge kóterýge atsalysýymyz kerek», - dedi E. Qanaǵatov.
