Bolashaqta elektromobılderge degen suranys arta túsedi - QAQ
ASTANA. QazAqparat - Qazaqstannyń avtobıznes qaýymdastyǵynyń prezıdenti Andreı Lavrentev elektrmobılder naryǵyn damytýǵa qatysty pikir bildirdi, dep habarlaıdy QazAqparat tilshisi.
Uıym basshysynyń aıtýynsha, bolashaqta elektrmobılderge degen suranys arta túsedi. Oǵan eshqandaı kedergi bolmaýy tıis. Áıtpese, benzın men dızelmen júre beremiz dep, artta qalýymyz ábden múmkin.
«Ashyǵyn aıtý kerek, búginde bári birdeı elektrmobılderdi qoldap otyrǵan joq. Kezinde biz smartfondardy da birden qabyldaǵan joqpyz. Áli esimde, 2007 jyly irgeli basylymdar «Ericsson»-nan artyq telefon joq» dep jarysa jazdy. Nokia-dan asqan telefon bolmaıdy dep oıladyq. Qazir osy saladaǵy naryq túbegeıli ózgerdi. Smartfonsyz ómir súrý múmkin emes. Óıtkeni ondaı telefonmen yńǵaıly, tıimdi ári jyldam baılanysqa shyǵýǵa bolady. Sol sııaqty elektrmobılderdiń de artyqshylyqtary kóp», - dedi A.Lavrentev Astanada ótken baspasóz máslıhatynda.
Onyń oıynsha, Qazaqstanda elektromobılder naryǵyn damytýdy tezdetip qolǵa alý qajet. Alaıda bul baǵytta kedergiler de joq emes.
«Menińshe, keıbir uıymdar tarapynan qarsylyq bar. Bıznes te qatty qyzyǵýshylyq tanytyp otyrǵan joq. Adamdardyń ózderi de benzınmen júrýge úırenip qaldy. Degenmen, bizdi birqatar ákimdikterdiń ustanymy qýantady. Máselen, Astana, Aqtaý, Pavlodar men Atyraýdyń ákimdikteri elektrmobılderdiń ınfraqurylymyn qoǵamdyq kólik salasynan bastaýǵa sheshim qabyldady», - dep atap kórsetti A.Lavrentev.
Aıta keteıik, búgin Qazaqstannyń avtobıznes qaýymdastyǵy ótken jyldyń qorytyndysyn shyǵardy.
Uıymnyń vıtse-prezıdenti Anar Maqashevanyń aıtýynsha, ótken jyly qazaqstandyqtar 60 myń jańa kólikti satyp aldy. Sonyń teń jartysy - óz elimizde qurastyrylǵan avtomobılder. Jalpy, Qazaqstan xalqy jańa kólikterdi satyp alýǵa 547 mlrd teńge jumsady. Bul 2017 jylmen salystyrǵanda 24 protsentke artyq.
Al Úkimet otandyq kólik markasyn jasap shyǵarýdy tapsyrdy.
