Bolashaqta BAQ qalaı ózgeredi – vıtse-mınıstrdiń boljamy
ASTANA. KAZINFORM – Bolashaqta telearnalar, ınternet basylymdary men gazetter arasyndaǵy aıyrmashylyq birtindep joıylyp, aqparat taratý isi birtutas júıege birigýi múmkin. Bul týraly Astana Media Week 2026 forýmynda Mádenıet jáne aqparat birinshi vıtse-mınıstri Qanat Ysqaqov aıtty.
Onyń aıtýynsha, tsıfrlyq tehnologııalar men jasandy ıntellekt redaktsııalardyń qalyptasqan jumys tártibin ózgertip jatyr. Aldaǵy ýaqytta telearnalar, ınternet basylymdary men gazetter bólek jumys istemeı, materıaldardy ortaq júıede ázirlep, túrli arnalar arqyly taratýy múmkin.
– Bolashaqta ınternet redaktsııasy da, televızııa da bólek bolmaıdy. Barlyǵyn biriktiretin birtutas medıa keńistik qalyptasady, – dedi Qanat Ysqaqov.
Birinshi vıtse-mınıstr buǵan Euronews kompanııasyn mysalǵa keltirdi. Kompanııa búginde telearna men jańalyqtar saıtyn júrgizýmen ǵana shektelmeı, tsıfrlyq platformalar men strımıng qyzmetterin damytyp, ınternet arqyly da habar taratady.
Qanat Ysqaqovtyń pikirinshe, jasandy ıntellekt aqparat quraldarynyń osyndaı ortaq júıege kóshýin jedeldetýi múmkin. Óıtkeni bul tehnologııa materıal daıyndaýdy jeńildetip, ony túrli arnalar arqyly taratýǵa múmkindik beredi. Alaıda birinshi vıtse-mınıstr jasandy ıntellektiniń múmkindigin asyra baǵalamaý keregin eskertti. Onyń aıtýynsha, jańa tehnologııa eń aldymen jýrnalısterdiń jumysyn tıimdi etýge kómektesetin qural retinde qoldanylýy tıis.
– Eń bastysy – ony qoldanýdaǵy jaýapkershilik, – dedi ol.
Sonymen qatar birinshi vıtse-mınıstr tehnologııalar men aqparat taratý tásilderi ózgergenimen, aýdıtorııa senimin saqtaý, redaktsııalardyń jaýapkershiligi jáne kásibı talaptardy ustaný mańyzdy bolyp qala beretinin atap ótti.
Aıta keteıik, Astana Media Week 2026 forýmy 14–16 qazan aralyǵynda Astanadaǵy Beıbitshilik jáne kelisim saraıynda ótedi.
Buǵan deıin dástúrli jýrnalıstıkanyń qazirgi jaǵdaıy men bolashaǵy týraly jazǵan edik.
