«Bolashaqpen» oqyp kelgen jastar elimizdiń damýyna óz úlesin qosyp júr - Toqaev

NUR-SULTAN. QazAqparat - Jastarǵa jan-jaqty qoldaý kórsetý - memleket saıasatynyń basty baǵyttarynyń biri. Bul týraly búgin Aqordada «Táýelsizdik urpaqtary» grantyn saltanatty tabystaý sharasynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Táýelsizdik jyldarynyń ishinde Qazaqstanda azamattardyń jańa býyny, onyń ústine laıyqty býyny ósip shyqty. Jastarǵa jan-jaqty qoldaý kórsetý - memlekettik saıasattyń basty baǵyttarynyń biri sanalady. Ótken ǵasyrdyń 90-shy jyldarynyń alǵashqy jartysyndaǵy júıeli daǵdarys jaǵdaıynda Qazaqstan aýqymdy «Bolashaq» baǵdarlamasyn iske qosty. Bul - Tuńǵysh Prezıdentimiz Nursultan Nazarbaevtyń bastamasy bolatyn. Osy baǵdarlamanyń arqasynda elimizdiń túkpir-túkpirinen myńdaǵan jas álemniń úzdik joǵary oqý oryndarynda bilim aldy jáne bilim alyp ta jatyr. Olardyń kópshiligi qazirdiń ózinde Qazaqstannyń kezeń-kezeńimen damýyna óz úlesin qosyp keledi», - dep atap ótti Memleket basshysy.