Bolashaqqa qamqorlyq balalyq shaqtan bastalady: «Otbasy bank» bastamalary qoldaý kórsetedi
ASTANA. KAZINFORM – Balanyń jarqyn bolashaǵy búgin jasalǵan qamqorlyq pen durys josparlaýdan bastalady. Sapaly bilim alý, alǵashqy baspanaǵa qol jetkizý jáne úlken ómirge senimdi qadam basý úshin qarjylyq negizdi erterek qalyptastyrǵan jón. Bul rette «Otbasy bank» tıimdi baǵdarlamalardy usynady. Banktiń áleýmettik bastamalary turǵyn úı, bilim jınaǵynan bastap balalardy memlekettik qoldaý, áleýmettik turǵydan osal toptardy baspanamen qamtýǵa deıingi mańyzdy kezeńderdi qamtıdy.
«Arnaý» – baspanaǵa birinshi qadam
«Otbasy bank» balasynyń baspana máselesin búginnen oılaǵan ata-analar úshin «Arnaý» arnaıy depozıtin usynady. Ol keminde 10 jyl aralyǵynda turǵyn úıge qarjy jınaýǵa múmkindik beredi. Shottaǵy qarajatqa jyl saıyn banktiń 2%, memlekettiń 20% syıaqysy qosylady. Qazir 6-8 jastaǵy ul-qyzyńyzdyń atyna «Arnaý» depozıtin ashyp, turaqty túrde toltyrsańyz, balańyz mektepke baryp, eseıip, bolashaq mamandyǵyn tańdap jatqan tusta onyń jınaq shotyndaǵy qarajat ta ósedi. Bul aralyqta depozıtte turǵyn úı baǵasynyń teń jartysy jınalady. Qalǵan 50%-yn bank jyldyq nebary 2% (JTSM 2,11% bastap 3,26% deıin) mólsherlememen beredi. Sóıtip, balańyz 18 jasqa tolǵanda óz úıi bolady. 2026 jylǵy 23 qazandaǵy jaǵdaı boıynsha 48 810 «Arnaý» depozıtinde 7,6 mlrd teńge jınalǵan. Bıyldyń ózinde 6836 jańa shot qosyldy.
Bilimge arnalǵan qarjylyq qoldaý
Bala ómirindegi mańyzdy kezeń – bilim alýda da «Otbasy bank» qoldaý kórsetedi. «AQYL» bilim berý jınaǵy búgingi oqýshylardyń bolashaqta otandyq nemese sheteldik oqý oryndarynyń stýdenti atanýyna jaǵdaı jasaýda. Bul depozıt boıynsha mólsherleme – 12,96% (JTSM 13,75% bastalady). Sonymen qatar memleket salymǵa 5% syıqy qosady. Jetim, múmkindigi shekteýli balalarǵa, kópbalaly jáne az qamtylǵan otbasylardyń balalaryna 7% mólsherinde syıaqy qarastyrylǵan. Búginde osyndaı 199 763 bilim jınaǵy bar. Bul shottarda 25 mlrd teńge saqtaýly. Al memlekettiń tólegen syıaqy kólemi – 263 mln teńge.
Sapaly bilim alýǵa «Keleshek» júıesi de tıimdi. Onyń aıasynda memleket balalardyń bilim alýyna bastapqy kapıtal aýdarady. Bıyl negizgi sanattaǵy balalarǵa 259 500 teńge, basymdyqqa ıe sanattarǵa 519 myń teńge esepteledi. Búginde bastapqy kapıtal kólemi 10,8 mlrd teńge bolatyn 44 783 kelisimshart jasaldy. Onyń aıasynda 396 bala qosymsha qoldaý aldy. Endi bilim jınaǵy bar bala erteńgi kúni ózi qalaǵan mamandyq ıesi atanýy úshin esh alańdamaıdy.
Úlken ómirge nyq qadam
«Otbasy bank» «Ulttyq qor – balalarǵa» baǵdarlamasynyń operatory retinde kámelettik jasqa tolmaǵan jetkinshekterdiń banktegi shottaryna jyl saıyn Ulttyq qordan aýdarylatyn úlesti baspana jaǵdaıyn jaqsartýǵa ne bilim alýǵa jumsaýǵa kómektesip keledi. Búginde 18 jasqa tolǵan jastar barlyǵy 29,7 mlrd teńgeni qajetine jaratty. Onyń ishinde 23,8 mlrd teńgesi turǵyn úıge, 5,9 mlrd teńge bilim alýǵa baǵyttaldy.
Ótken jyldyń mamyr aıynan bastap bank baspanamen qamtý salasynda ulttyq damý ınstıtýtynyń da qyzmetin qatar atqaryp keledi. Zańǵa sáıkes, memleketten beriletin baspanadaǵy páterlerdiń keminde 20%-y jetim jáne ata-ananyń qamqorlyǵynsyz qalǵan balalarǵa úlestirilýi tıis. Qazir 59541 bala úı kezeginde tur. Byltyr olarǵa 164, bıyl 619 jeńildetilgen nesıe berildi. Oǵan qosa, 4130 adam jaldamaly baspanamen qamtylyp.
Kópbalaly jáne múgedektigi bar balany tárbıelep otyrǵan otbasylar da nazardan tys qalmady. Bıyl kópbalaly otbasylarǵa 65,4 mlrd teńge bolatyn 3521 jeńildetilgen nesıe, erekshe kútimdi qajet etetin balasy bar otbasylarǵa 13,6 mlrd teńgege 770 zaem berildi.
«Qazir ata-analar balalarynyń bolashaǵyn aldyn ala oılap, mańyzdy qadamdarǵa erterek daıyndala alady. Mysaly, alǵashqy baspanasyna qarajat jınap, sapaly bilim alýyna qajetti qor qalyptastyryp, memlekettik qoldaý baǵdarlamalaryn paıdalanýǵa múmkindik bar. Otbasy bul joldy neǵurlym erte bastasa, balasynyń bolashaǵyna soǵurlym kóp múmkindik jasaıdy. «Otbasy bankte» biz otbasylarǵa osyndaı múmkindikter usynatyn birqatar áleýmettik bastamalardy júzege asyryp kelemiz. Olardyń qatarynda «Arnaý» turǵyn úı depozıti, AQYL bilim berý jınaq salymy, «Keleshek» baǵdarlamasy, «Ulttyq qor – balalarǵa» jobasy, halyqtyń áleýmettik osal toptaryna arnalǵan turǵyn úı baǵdarlamalary bar.
Bul bastamalardyń árqaısysy ártúrli maqsatty kózdegenimen, barlyǵynyń ortaq mindeti – balalardyń bolashaǵyna senimdi negiz qalaý. Biz Qazaqstandaǵy árbir balanyń baqytty balalyq shaǵy bolǵanyn, sapaly bilim alyp, ózine unaıtyn mamandyqty tańdap, bolashaqta jeke baspanasyna qol jetkizgenin qalaımyz. Óıtkeni bizdiń ortaq mindetimiz – balalarǵa búgin qoldaý kórsetip qana qoımaı, olardyń erteńgi kúnine jol ashatyn múmkindikterdi kóbeıtý», – dep atap ótti «Otbasy bank» basqarma tóraıymy Lázzat Ibragımova.
Iá, «Otbasy bank» barlyq bastamasynyń maqsaty bir – balalar úshin sapaly bilim men qolaıly baspanany qoljetimdi etý. Sol úshin olardyń ár túrli ómir kezeńinde keshendi kómek kórsetip keledi. Nátıjesinde bala bar-joǵy bes jastan bastap jınaq shotyn ashyp, keıin dıplom men óz páteriniń kiltin alańsyz ala alady. Banktiń osyndaı quraldary ár balanyń áleýmettik jaǵdaıyna qaramastan sapaly bilimmen, turǵyn úımen qamtylýyna baǵyttalǵan.