Bolashaqqa ınvestıtsııa: Senatorlar zeınetaqy aktıvterin basqarý máselelerin talqylady

ASTANA. KAZINFORM – Senattyń Qarjy jáne bıýdjet komıtetiniń depýtattary «Zeınetaqy aktıvterin basqarýdyń tıimdiligi» taqyryby boıynsha dóńgelek ústel otyrysyn ótkizdi.

Qatysýshylar shara barysynda jınaqtaýshy zeınetaqy júıesiniń qazirgi jaǵdaıyn, Biryńǵaı jınaqtaýshy zeınetaqy qorynyń ınvestıtsııalyq strategııasynyń tıimdiligin jáne azamattardyń múddesin eskere otyryp, zeınetaqy aktıvterin basqarý tetikterin jetildirý máselelerin talqylady.

Senat komıtetiniń tóraǵasy Sultanbek Mákejanov óz sózinde zeınetaqy jınaqtaryn tıimdi ınvestıtsııalaý zeınetaqy júıesiniń turaqtylyǵyn qamtamasyz etýdegi mańyzdy faktor ekenin atap ótti.

«Zeınetkerlik jasqa deıingi jınaqtalǵan qarajattyń jaı ǵana shotta saqtalmaı, kóbeıip otyrýy úshin ony tıimdi ınvestıtsııalaý qajet. Zeınetaqy jınaqtaryn ınvestıtsııalaýdyń tıimdiligi azamattardyń zeınetaqymen qamsyzdandyrylý deńgeıine tikeleı áser etedi. Sondyqtan bul másele árdaıym qoǵam úshin ózekti bolyp qala bermek», – dedi ol.

Depýtattar, memlekettik organ ókilderi men sarapshylar talqylaý barysynda jınaqtaýshy zeınetaqy júıesiniń makroekonomıkalyq kórsetkishterin, zeınetaqy aktıviniń qazirgi bólinisin jáne onyń ınvestıtsııalyq tıimdiligin qarastyrdy. Ásirese, zeınetaqy qarjysyn ınfraqurylymdyq jáne agrarlyq jobalardy qarjylandyrýǵa paıdalaný máselesine, sondaı-aq zeınetaqy jınaqtarynyń kiristiligin arttyrý joldaryna erekshe nazar aýdaryldy.

Dóńgelek ústel otyrysyna qatysýshylar zeınetaqy aktıvterin basqarý júıesin jetildirýge baǵyttalǵan birqatar usynystar ázirledi. Bul usynystar jan-jaqty qarastyrý jáne iske asyrý úshin tıisti memlekettik organdarǵa joldanatyn bolady.

Buǵan deıin Senat tóraǵasy Qytaıdyń Qazaqstandaǵy Elshisimen kezdesken.