Bolashaqqa baǵdar: mektep pen bıznes seriktestigi jańa sapaǵa shyqty
ATYRAÝ. KAZINFORM — Atyraýda pedagogtar, sarapshylar men jumys berýshiler bas qosqan halyqaralyq konferentsııa óz jumysyn túıindedi. Qatysýshylardyń pikirinshe, kásibı baǵdar júıesin jańǵyrtý — elimizdiń adamı kapıtalynyń sapasyn arttyrýǵa yqpal etetin negizgi tetik.
Atyraýda «Qazirgi ózgerister zamanyndaǵy mansaptyq bilim: óńirlik syn-qaterlerden júıeli sheshimderge deıin» atty halyqaralyq ǵylymı-praktıkalyq konferentsııa ótti. Jıynǵa shamamen 300 maman — muǵalimder, mektep basshylary, kásibı baǵdar berýshiler, sondaı-aq qazaqstandyq jáne sheteldik sarapshylar qatysty. Forým búgingi qarqyndy áleýmettik-ekonomıkalyq ózgerister jaǵdaıynda oqýshylardy bolashaq eńbek naryǵyna beıimdeýdiń jańa tásilderin talqylaýǵa arnalǵan aýqymdy dıalog alańyna aınaldy.
Plenarlyq otyrysta Atyraý oblysy Bilim berý basqarmasy basshysynyń orynbasary Sveta Amanshıeva, «Atameken» kásipkerler palatasynyń ókilderi, Canadian International School, «Qazaqmys» korporatsııasynyń polıtehnıkalyq kolledji, APEC PetroTechnic joǵary kolledji jáne Qaraǵandy oblysynyń mektepteri usynystaryn ortaǵa saldy.
«Órleý» biliktilik arttyrý ınstıtýtynyń Atyraý oblysy boıynsha fılıal dırektory Marjan Ǵalymjanova kásibı baǵdar berý júıesiniń sapasy el ekonomıkasynyń turaqtylyǵy men eńbek resýrstarynyń básekege qabilettiligin aıqyndaıtynyn atap ótti.
— Mektep pen jumys berýshi arasyndaǵy seriktestikti kúsheıtý — oqýshylardy bolashaqqa daıyndaýdyń negizgi sharty. Birlesken jobalar balalarǵa mamandyqty sanaly túrde tańdaýǵa jol ashady ári salalardyń naqty qajettiligin túsindiredi, — dedi ol.
Onyń aıtýynsha, kásibı baǵdar beretin arnaıy pedagogterdiń engizilýi jáne zamanaýı konsýltatsııalyq tásilderdiń qoldanylýy mektepterdiń eńbek naryǵyndaǵy ózgeristerge jedel beıimdelýine múmkindik beredi.
Konferentsııanyń negizgi maqsaty — únemi ózgerip otyratyn jaǵdaılarda mansaptyq bilimdi damytýdyń júıeli mehanızmderin talqylaý. Qatysýshylar kásibı baǵdarlaýdy bilim berý protsesine engizýdiń jańa ádisterin qarastyryp, tájirıbe almasty. Sonymen qatar kadr daıarlaý isine áser etetin óńirlik erekshelikter men syn-qaterler keńinen talqylandy.
Jahandyq úrdisterge de erekshe nazar aýdaryldy. The Ulytau Educational Foundation qorynyń dırektory Marına Han qazirgi zamannyń basty ereksheligi — úzdiksiz bilim alý qajettiligi ekenin atap ótti.
— Búginde adam ómir boıy oqıdy. Sondyqtan mekteptegi kásibı baǵdar berý múlde jańa maǵynaǵa ıe bolýda. Oqýshylardyń oqý kezinde-aq bolashaq jumys berýshilerimen baılanys ornatýy úshin bıznes, memlekettik qurylymdar jáne bilim uıymdary kúsh biriktirýi tıis, — dedi ol.
Konferentsııa memlekettik organdardy, bıznes qurylymdaryn jáne bilim berý uıymdaryn toǵystyrǵan mańyzdy alań boldy. Sharany The Ulytau Educational Foundation qory, Atyraý oblysynyń ákimdigi men Bilim berý basqarmasy, «Atameken» UKP, APEC PetroTechnic joǵary kolledji, «Órleý» ortalyǵy jáne Canadian International School Astana uıymdastyrdy.
Jıyn «Bolashaqqa birge: mektep pen bıznes seriktestiginiń jastardy zamanaýı karerlik trendterge jáne syn-qaterlerge beıimdeýdegi róli» atty dóńgelek ústelmen túıindeldi. Onda óńirdiń korporatıvtik sektor ókilderi bilim berý uıymdarymen yqpaldastyq tásilderin talqylady. BRIF Research Group prezıdenti Aleksandr Rýzanov qazaqstandyq jastardyń kózqarasy men kásibı úmitterine qatysty zertteý nátıjelerin usynyp, «kásiporyn — mektep» júıesindegi ózekti tendentsııalardy atady. Sondaı-aq Petrocouncil jáne The Ulytau Educational Foundation ókilderi sóz sóıledi.
Dóńgelek ústel moderatory, Business Advancement School kompanııasynyń teń quryltaıshysy Aıjan Hamıtova syndarly dıalogtyń eńbek naryǵy men mektep arasyndaǵy baılanysty nyǵaıtýǵa sep bolatynyn aıtty. Talqylaý bıznes ókilderiniń jas mamandardy daıarlaý úderisine qatysýǵa daıyn ekenin, al kásibı baǵdardaǵy júıeli tásil bul jumysty edáýir tıimdi etetinin kórsetti. Kezdesý qorytyndylary mektep oqýshylaryna qazirgi zamanǵy mansaptyq trendterdi túsinýge jáne suranysqa ıe mamandyqty senimdi tańdaýǵa múmkindik beretin keń aýqymdy seriktestiktiń mańyzyn dáleldedi.