Bolashaqqa arnalǵan ekonomıkalyq damý satylary osy tomdyqtarda naqty kórsetilgen - Orazaly Sábden
ALMATY. 22 qarasha. QazAqparat /Erlik Erjanuly/ - Bul kóp tomdyq Qazaqstan qandaı el, bolashaǵy qandaı, alda qandaı ózgerister bolady jáne jahandyq úderisterge qalaı jaýap berý kerek degen suraqtarǵa jaýap beredi. Ony Qazaqstan Ǵalymdar odaǵynyń prezıdenti, Ekonomıka ınstıtýtynyń dırektory Orazaly Sábden búgin Almatydaǵy ál-Farabı atyndaǵy Qazaq ulttyq ýnıversıtetinde 21 tomdyq «Ekonomıka» tańdamaly jınaǵynyń tusaýkeser rásiminde aıtty.
«Ekonomıka» kóp tomdyǵy - kóp jylǵy jınaqtalǵan, júıelengen eńbekterdiń jemisi. Jas ǵalymdarǵa, magıstranttarǵa, doktoranttarǵa jáne ekonomıstter úshin taptyrmas qundy dúnıe. Munda el táýelsizdiginiń qalyptasýy, órkendeýi keńinen qarastyrylǵan», - deıdi ál-Farabı atyndaǵy QazUÝ rektory Ǵalym Mutanov. QR UǴA Akademıgi Amanjol Qoshanovtyń paıymdaýynsha, «Kóp tomdyq - ekonomıkalyq damýdyń ǵylymı negizi, ǵylymı boljamy jáne ekonomıkalyq ósýge naqty tikeleı qural dep baǵalaımyn. Jańa kezeńde Qazaqstan qandaı quralmen jaýap berý kerek degen máselelerdi qamtýymen mańyzdy». Akademık Saǵyndyq Satybaldın oǵan - «Eldiń bolashaǵyna arnalǵan úlken eńbek. Qazaqstan qaıda bara jatyr, bolashaq qandaı bolady, elimiz ósip-órkendeýdiń qandaı dárejesinde degen saýaldar tolyq qamtylǵan», - degen baǵa berdi. Al kitap avtory, ekonomıst-ǵalym, QR Memlekettik syılyǵynyń ıegeri O. Sábdenniń sózine qaraǵanda, endi memlekettik deńgeıde 3 aýdıt qurylý qajet. Birinshisi - memlekettik shyǵyndarmen jumys istese, ekinshisi - tehnologııalyq deńgeılerdi saralaýmen, úshinshisi - rýhanı dúnıelerdi jańǵyrtý jumystarymen aınalysýy kerek.
