Bolashaq zeınetkerlerdiń qalypty ómirin qamtamasyz etý úshin alda kezdesýi múmkin qıyndyqtyń bári búgin sheshilýi tıis - O. Asanǵazy
ASTANA. 17 sáýir. QazAqparat - Keleshekte zeınetkerlerdiń qalypty ómirin qamtamasyz etý úshin bolashaqta kezdesýi múmkin qıyndyqtyń bári búgin sheshilýi tıis.
Búgin Parlament Májilisinde «Qazaqstan Respýblıkasynda zeınetaqymen qamsyzdandyrý týraly» zań jobasyn talqylaý barysynda depýtat Orazkúl Asanǵazy osylaı málim etti.
Eske salsaq, zań jobasynyń basty jańalyǵy áıelderdiń zeınetkerlik jasyn birizdendirý bolyp tabylady. Bul rette zań jobasynda qamtylǵandaı zeınetkerlik jasty kóterý 2014 jyldyń 1 qańtarynan bastap zeınetkerlik jasty jyl saıyn 6 aıǵa ulǵaıta otyryp, birtindep 10 jyldyń ishinde júzege asyrý kózdeledi. Sóıtip, 2023 jyldan bastap áıelder men erler úshin zeınetkerlik jas 63-ke teńesedi.
«Úkimet usynǵan zań jobasyn ábden talqylap, búginimizdi, bolashaǵymyzdy jan-jaqty sarapqa salǵannan soń, bul zań jobasynyń qajettiligine kóz jetti. Ony kezdesýlerde halyqqa da aıtyp, barynsha túsindirýge tyrystyq. Parlamentte halyq atynan otyrǵandyqtan, jurtshylyqtyń joǵyn joqtap, muńyn aıtý paryz», dedi depýtat O. Asanǵazy.
Sonymen qatar, ol zań jobasyn qoldaıtyndyǵyn aıta kele, keleshekte zeınetkerlerdiń qalypty ómirin qamtamasyz etýge senimdi bolýy úshin bolashaqta kezdesýi múmkin qıyndyqtyń bári búgin sheshilýi tıistigin atap ótti. «Bul úshin zań jobasy qabyldanǵanda azamattardyń, ásirese áıelderdiń áleýmettik jaǵynan qorǵalatynyn, ıaǵnı jumyspen de, zeınetaqymen de qamtylatynyna kepildik bolýy kerek. Óıtkeni, 50-den asqan soń «káriler» sanatyna ótip, jumyssyz qalyp jatqan áıelder jetkilikti. Olardyń múddesi qorǵalýy kerek. Sondyqtan da, atqarýshy bılik sóz júzinde emes, is júzinde áıel azamattarynyń áleýmettik jaǵynan qorǵalyp, erteńgi kúni laıyqty ómir súrýdiń jaǵdaıyn jasaýy, arnaıy baǵdarlamalar ázirleýi kerek dep oılaımyn», - dedi O. Asanǵazy.
