Bolashaq úshin, kásibı mamandar úshin, tynyshtyq pen turaqtylyq úshin óz daýysymyzdy berip jatyrmyz - Memlekettik hatshy

ASTANA. QazAqparat - Búgin elimizde Parlament Májilisiniń depýtattary men jergilikti máslıhatty saılaý bastaldy. Astana qalasyndaǵy QR Ulttyq kitaphanasynda ornalasqan №89 saılaý ýchaskesinde QR Memlekettik hatshysy Gúlshara Ábdiqalyqova óz daýysyn berip, tańdaý jasady.

«Búgin - qazaqstandyqtar úshin asa mańyzdy ári jaýapty kún. Óıtkeni elimizde úlken reformalar bastalyp jatyr. Al ol reformalardy júzege asyrý úshin kásibı Parlament qajet. Jergilikti jerlerde de ómirdiń ál aýqatyn damytatyn jaqsy máslıhattar kerek. Sondyqtan da, biz bolashaq úshin, kásibı mamandar úshin, tynyshtyq pen turaqtylyq úshin óz daýysymyzdy beremiz», - dedi G. Ábdiqalyqova.

Eske salaıyq, búgin 20 naýryz kúni  tańerteńgi saǵat 7.00-de elimizde Parlament Májilisiniń depýtattaryna daýys berý bastaldy. Sonymen qatar oblystyq, aýdandyq jáne qalalyq máslıhattardyń depýtattaryna da daýys berý bastalyp otyr. Jergilikti ýaqyt boıynsha tańǵy saǵat 7.00-den keshki saǵat 20.00-ge deıin 9840 saılaý ýchaskesinde daýys berý ótedi, munan bólek shetelde 65 saılaý ýchaskesi jumys isteıdi.

9 791 165 qazaqstandyq daýys berýshiler tizimine engizilgen.