Bolashaq urpaqtyń bilim-biligin bir arnaǵa toǵystyrý - basty mindet - «Nazarbaev zııatkerlik mektepteri» AQ Basqarma tóraıymy
ASTANA. 2 aqpan. QazAqparat /Aıdar Ospanalıev/ -«Búginde balalar Qazaqstan tarıhyn táýir meńgergen.
Olar mádenıetimiz ben ekonomıkamyzdy jaqsy biledi. Al osylardyń barlyǵyn bir arnaǵa toǵystyra otyryp, «Bul meniń Otanym - Qazaqstan» degen máseleni uǵyndyra bilý bizdiń aldymyzdaǵy úlken mindet», -deıdi «Nazarbaev zııatkerlik mektepteri» aktsıonerlik qoǵamynyń Basqarma tóraıymy Kúlásh Shámshıdınova. Bul týraly ol búgin aktsıonerlik qoǵamnyń 2010 jyly atqarǵan jumystarynyń qorytyndysymen tanystyrý barysynda málim etti.
«Biz mundaı oıǵa «Bolashaq» baǵdarlamasyna úmitkerlermen tildesý barysynda da kóz jetkizdik. Olardan óz Otanyń úshin maqtanasyń ba dep suraǵanda olardyń oılary shashyraı jóneledi. Óıtkeni olar óz otandaryna qatysty oılaryn ushtastyra almaı qınalady. Sondyqtan qazir zııatkerlik mektepterde «Qazaqstan qazirgi álemde» atty jańa pán engizildi»,-dedi K.Shámshıdınova.
Sondaı-aq onyń aıtýynsha, statıstıka álemniń kóptegen elderinde oqytylatyn pán. Ol matematıkalyq, fızıkalyq bilimdi paıdalanýda úlken kómek bolady. «Al aqparattyq tehnologııalardy meńgermeseń, búgingi qoǵamda ómir súrýdiń ózi qıyn. Sondyqtan bizde barlyq pánderdi qamtıtyn jáne bilim berý salasyndaǵy osyndaı ózekti máselelerdi qarastyratyn baǵdarlamalar bar», - dedi Basqarma tóraıymy.
