«Bolashaq» túlekteriniń ortasha jalaqysy belgili boldy

ASTANA. 5 qarasha. QazAqparat - Búgin elordada «Bolashaq» baǵdarlamasynyń tıimdiligin baǵalaý» atty zertteý nátıjesiniń qorytyndysy men ǵylymı monografııa jobasyn tanystyrý barysynda «Nur Otan» partııasynyń Qoǵamdyq saıasat ınstıtýtynyń basshysy Nurbek Saıasat «Bolashaq» túlekteriniń ortasha jalaqylaryn jarııa etti.

«Bolashaq» baǵdarlamasy stıpendıattarynyń jumysqa ornalastyrylýy óte ózekti másele. Qazirgi ýaqytta zertteý boıynsha, túlekterdiń 92 paıyzy turaqty jumyspen qamtylǵan. 5,5 paıyzy bala kútimine baılanysty nemese bilimin odan ári jalǵastyrýǵa oraı jumysqa ornalaspaǵan, suralǵandardyń 2,5 paıyzy jumyssyz nemese ózin ózi qamtyǵandar sanatyna jatqyzǵan», - deıdi N.Saıasat.

Onyń aıtýynsha, zertteýge qatysqan 1338 túlektiń 38 paıyzǵa jýyǵy 100 myńnan 200 myń teńgege deıin jalaqy alatyn kórinedi. Shamamen 27 paıyzy aı saıyn 300 myń teńgege deıin aılyq alyp turady. 17 paıyzy - negizinen memlekettik qyzmettegi «Bolashaq» túlekteri 100 myń teńgeden az jalaqy alady.

20 jyl ishinde «Halyqaralyq baǵdarlamalar ortalyǵy» AQ málimetteri boıynsha 9500 stıpendııa taǵaıyndalǵan.