«Bolashaq» túlekteriniń ortasha jalaqysy 400 myń teńgeden joǵary bolyp otyr - vıtse-mınıstr
ASTANA. QazAqparat - 2015 jyldyń qorytyndysy boıynsha, «Bolashaq» túlekteriniń 99,4 paıyzy jumysqa ornalasqan. Bul týraly búgin Ortalyq kommýnıkatsııalar qyzmetinde ótken brıfıngte QR Bilim jáne ǵylym vıtse-mınıstri Tahır Balyqbaev málim etti.
Onyń málimetteri boıynsha, 1994 jyldan beri «Bolashaq» stıpendııasyn 11 727 adam aldy. Olardyń ishinde 1667 adam ónerkásip salasynan, 1694 adam bilim jáne ǵylym salasynan, 1394-i aqparattyq tehnologııalar, 619 medıtsına salasynan oryn tapsa, 400-den astamy memlekettik qyzmetker jáne basqa da qyzmetterge ornalasty.
«Endi biz stıpendıanttardyń sapalyq quramy men jetistikterin aıtatyn bolsaq, «Bolashaq» túlekteriniń 503-i memlekettik qurylymdarda, ulttyq kompanııalarda, densaýlyq saqtaý uıymdarynda joǵary basqarýshylyq býyndarda qyzmet etýde. Olardyń qatarynda 4 vıtse-mınıstr, 5 oblys jáne qala ákimderi, 3 oblys nemese qala ákimderiniń orynbasarlary, sonymen birge 81-i memlekettik uıym jáne mekemeniń basshysy, ulttyq kompanııalar men bankterdiń bólimsheleriniń 106 birinshi basshysy men basqarma músheleri jáne 246 jeke uıym basshylary bar. Osy túlekterdiń 20 paıyzdan astamy búgingi tańda óńirlerde jumys istep kele jatyr», - deıdi ol.
T.Balyqbaevtyń sózine qaraǵanda, mınıstrlik túlekterdiń jumysqa ornalasýyn jiti baqylap keledi.
«Biz osy birneshe jyl boıy túlekterdiń jumysqa ornalasýyn, jalpy deńgeıin baǵalaýdamyz. Ótken jyldyń qorytyndysy boıynsha, túlekterdiń 99,4 paıyzy jumysqa ornalasty. Sonymen birge ortasha jalaqylaryn eseptep kórsek, búgingi tańda «Bolashaq» túlekteriniń ortasha jalaqysy 400 myń teńgeden joǵary bolyp otyr. Osynyń barlyǵy «Bolashaqtyń» nátıjeliligin, jetken jetistikterin kórsetip otyrady», - dep atap ótti vıtse-mınıstr.
