«Bolashaq» túlekterin qyzmette árdaıym kótermeleıtin bolady
ASTANA. QazAqparat - Qazaqstannyń memlekettik hatshysy, mamandardy shetelde daıarlaý respýblıkalyq keńesiniń tóraǵasy Gúlshara Ábdiqalyqova «Bolashaq» baǵdarlamasyndaǵy ózgerister týraly aıtyp berdi, dep habarlaıdy QazAqparat.
«Qazir biz tereń taldaý jasaǵymyz kelip otyr. «Bolashaq» túlekteri qaıda jumys istep jatyr, el ekonomıkasyna tıgizip jatqan úlesteri qandaı, kimdi mansap jolynda kóterýge turady degen sııaqty saýaldarǵa jaýap tapqymyz keledi. Sondyqtan osy baǵytta naqty jumystar jasalatyny anyq», - dep atap ótti ol.
Gúlshara Ábdiqalyqova naqtylap ótkenindeı, mundaı qadamdar «Bolashaq» prezıdenttik baǵdarlamasyn ary qaraı jetildirý aıasynda jasalmaq. Onyń ústine, grant ıegerlerin anyqtaý barysynda eń daryndy jastarǵa kóńil aýdarylady, olardy álem boıynsha reıtıngteri eń joǵary 70 ýnıversıtetke jiberý kózdelgen.
«Biz bıyldan bastap, qujat qabyldaý rásimine ózgerister engizemiz. Burynǵy qabyldaý tártibi óte kúrdeli bolyp ketken. Úmitkerler negizinen esse tapsyratyn bolady. Biz ózin-ózi damytýda úlken áleýet tanytqan shyǵarmashyl jastarǵa kóńil bólemiz», - dedi Memlekettik hatshy.
Onyń eske salyp ótkenindeı, baǵdarlama ómirge kelgeli beri, 24 jyldyń ishinde 12 271 stıpendııa taǵaıyndalǵan. 9 427 maman dıplomdaryn alyp úlgerdi. Olardyń ishinde 40% - ınjenerlik-tehnıkalyq, 37% - áleýmettik jáne 14% - gýmanıtarlyq baǵyttar boıynsha bilim alyp kelgen.
«Túlekterdiń 98 paıyzy jumyspen qamtyldy. Olardyń ishinde 55 paıyzy - memlekettik organdarda, 30 paıyzy - jeke sektorda, kvazımemlekettik kompanııalarda, 12 paıyzy halyqaralyq uıymdarda jumys isteıdi. Qazirgi ýaqytta 1375 stıpendıat bilim alyp jatyr. Olardyń 50 paıyzy - Ulybrıtanııa men Irlandııada, 34 paıyzy AQSh pen Kanadada, 7 paıyzy - qurlyqtyq Eýropa elderinde», - dedi Gúlshara Ábdiqalyqova.
