Bolashaq túlekteri shetelde jumys isteýi kerek - Baǵdat Mýsın
ASTANA. QazAqparat - «Bolashaq» halyqaralyq stıpendııasymen bilim alǵan jastardyń shetelde jumys isteýine múmkindik berý kerek. Bul pikirdi BelnTech tehnologııalyq kompanııasynyń basshysy Baǵdat Mýsın Astanada Qazaqstan Technology forýmynda aıtty, dep habarlaıdy QazAqparat tilshisi.
«Shetelde jumys istegisi keletin bolashaqtyqtarǵa ruqsat berý kerek. Biraq, bul protsess bizdiń elshiliktermen tyǵyz qarym-qatynasta júrýi tıis. Eger baǵdarlama túlegi joǵary tehnologııalyq kompanııada jumys istese, ony Qazaqstanda 5 jyl jumys isteýge mindettep qoıý jaramaıdy», - dedi Baǵdat Mýsın.
Onyń aıtýynsha, «Bolashaq» baǵdarlamasy keler urpaqtyń zııatkerlik bolashaǵyn qalyptastyrýǵa baǵyttalǵan.
«Álemniń úzdik oqý ornynda 4-5 jyl oqyp kelgen zııatker urpaq Qazaqstanǵa kelip, óz múmkindikterin tolyq paıdalana almaıtyn memlekettik mekemege jumysqa turady. Olardy jiberý kerek, shetelde jumys istep, Qazaqstanǵa ıdeıa nemese enshiles qor qura alady. Sonda ǵana «Bolashaq» túlekteri ózge qazaqstandyqtarǵa úlgi bolarlyqtaı nátıje kórsetedi», - deıdi Baǵdat Mýsın.
«Bolashaq» halyqaralyq stıpendııasy Qazaqstan Respýblıkasynyń Prezıdenti N.Ə.Nazarbaevtyń 1993 jylǵy 5 qarashadaǵy qaýlysymen qurylǵan. BǴM keltirgen málimetterge sáıkes, 25 jylda «Bolashaq» halyqaralyq stıpendııasy 13 myńǵa jýyq úmitkerge berilgen.
