«Bolashaq» túlekteri maqtaaraldyq balalarǵa smartfondar tartý etti

TÚRKІSTAN. QazAqparat – «Bolashaq» prezıdenttik stıpendııa túlekteri maqtaaraldyq balalarǵa smartfondar tartý etti. Jastar Qońyrat aýylyndaǵy «Erkejan» jazǵy saýyqtyrý balalar lagerinde tynyǵyp jatqan jartylaı jáne tul jetim 55 balaǵa kitaptar men samokattar, rolıkter tabystady, dep habarlaıdy QazAqparat tilshisi.

«Bolashaq Ońtústik» Korporatıvtik Qorynyń eriktileri sonymen qatar balalarǵa Halyqaralyq «Bolashaq» baǵdarlamasynyń beretin múmkinshilikteri men kásiptik baǵdar týraly aıtty. Jetkinshekterge «Halyqaralyq Baǵdarlamalar Ortalyǵy» AQ prezıdenti Aınur Baǵdatqyzynyń beıne sálemdemesin kórsetti.

«Bolashaq» halyqaralyq baǵdarlamasynyń Túrkistan oblysy jáne Shymkent qalasyndaǵy túlekteriniń qaýymdastyǵy retinde Maqtaaral aýdanyndaǵy apattan zardap shekken otbasylarmen qatar kishkentaı búldirshinderimizge de arnaıy kóńil bólgimiz keldi. Osylaısha, barlyǵy 55 balaǵa qolymyzdan kelgenshe kómekteseýdi jón dep sheshtik. Aldaǵy ýaqytta basqa da osyndaı áleýmettik is-sharalardy ótkizýdi josparlap otyrmyz», – dedi «Bolashaq Ońtústik» KQ múshesi Gaýhar Tórebekova.

Oblystyq Jastar resýrstyq ortalyǵynyń basshysy Amalbek Ómirtaı aımaqtaǵy jastardyń atynan «Bolashaq Ońtústik» Korporatıvtik Qoryna alǵys bildirdi.