«Bolashaq» túlekteri Elbasy usynǵan bes ınstıtýtsıonaldyq reformanyń ózektiligine basa nazar aýdarady
«Asa Qadirli Elbasy!
Sizdi Qazaqstan Respýblıkasy Prezıdentiniń «Bolashaq» Halyqaralyq stıpendııasy stıpendıanttarynyń qaýymdastyǵy atynan saltanatty ulyqtaý rásimińizben quttyqtaımyz!
«Bolashaq» baǵdarlamasynyń túlekteri Siz usynǵan bes ınstıtýtsıonaldyq reformanyń mańyzdylyǵy men ózektiligine basa nazar aýdarady.
Bul halyqtyq reformalar - birtutas ult qalyptastyrýǵa baǵyttalǵan naqty qadamdar. Ony elimizdiń jalyndy jastary erekshe shabytpen qabyldady. Sebebi qazaqstandyq memlekettilikti odan ári nyǵaıtýdyń aıqyn baǵyttary, birinshi kezekte, jastar úshin qolaıly jaǵdaı jasaıdy.
Siz usynǵan reformalar ekonomıkalyq baǵdarlamalardy sapaly iske asyrýdy qamtamasyz etýge, elimizdiń básekege qabilettiligin arttyrýǵa jáne qazaqstandyqtardy barynsha biriktire túsýge úndeıdi.
Bul kúnde Sizdiń arqańyzda árqaısymyz óz áleýetimizdi, bilimimiz ben batyl ıdeıalarymyzdy týǵan elimizdiń ıgiligi úshin tolyqtaı iske asyra alatyndyǵymyzǵa senimdimiz», delingen quttyqtaýda.
