«Bolashaq» túlekteri men sheteldik stýdentter Respýblıka kúnine oraı fleshmob bastady
ASTANA. KAZINFORM — Respýblıka kúnine oraı shetelde bilim alyp júrgen qazaqstandyq stýdentter merekelik beınequttyqtaýlar jarııalap jatyr. Olar osylaısha elge degen qurmetin bildirip, otandastaryn ulttyq merekemen quttyqtaýda.
AQSh-taǵy Berklı ýnıversıtetiniń qoǵamdyq densaýlyq saqtaý magıstratýrasynyń stýdenti, anestezıolog-reanımatolog, medıtsına doktory, júrek-qan tamyrlary hırýrgııasyndaǵy anestezıologııa boıynsha sarapshy Aıman Isakova egemendik deklaratsııasy qazaqstandyqtarǵa álemniń túkpir-túkpirinde bilim alýǵa, tájirıbe jınaýǵa múmkindik bergenin atap ótti.
— Táýelsizdik — armanǵa jol ashqan erkindik. 1990 jyldyń 25 qazanynda qabyldanǵan Egemendik deklaratsııasy — táýelsiz Qazaqstannyń qalyptasý jolyndaǵy mańyzdy tarıhı beles. Sodan beri talaı nárse ózgerdi. Jańa múmkindikter ashyldy, jańa armandar paıda boldy. Qazir biz álemniń túkpir-túkpirinde bilim alýǵa, tájirıbe jınaýǵa múmkindik alyp otyrmyz. Bir kezderi alystaǵy arman bolyp kóringen dúnıeler búgin ómirimizdiń bir bólshegine aınaldy. Táýelsizdik — tek ótkenimizdiń jetistigi emes, búgingi tańdaýymyz ben erteńgi jaýapkershiligimiz. Respýblıka kúni qutty bolsyn! — dep jazdy Aıman Isakova Instagram-daǵy paraqshasynda.
Alýa Erlanqyzy Garvard ýnıversıtetinde qoǵamdyq densaýlyq saqtaý mamandyǵy boıynsha Bolashaq baǵdarlamasynyń stıpendıanty retinde bilim alyp jatyr. Ol da eline degen quttyqtaýyn jetkizdi.
— Búgin barshańyzdy Respýblıka kúnimen shyn júrekten quttyqtaımyn. Elimizdiń egemendigi máńgi, táýelsizdigimiz tuǵyrly bolsyn! — dedi ol.
Quttyqtaý joldap jatqandar arasynda sheteldik stýdentter de bar.
Aıta keteıik, buǵan deıin Respýblıka men Táýelsizdik kúnderiniń aıyrmashylyǵy nede ekenin jazǵan edik.
