«Bolashaq» túlekteri eldiń damýyna qandaı úles qosyp júr
ASTANA. KAZINFORM — «Bolashaq» halyqaralyq stıpendııasy stıpendıattarynyń qaýymdastyǵy Keńesiniń tóraǵasy Jánibek Katrenov baǵdarlama túlekteriniń búginde qaı salalarda qyzmet etip júrgenin aıtty.
— «Bolashaqtyqtar qaıda júr?» degen suraq qoǵamda jıi qoıylady. Ásirese halyqaralyq «Bolashaq» baǵdarlamasyna qatysty «túlekter shetelde qalyp qoıady», «memleket qarjysy syrtqa ketip jatyr» degen pikirler de aıtylyp keldi. Baǵdarlama júzege asqan ýaqyt ishinde álemniń úzdik joǵary oqý oryndarynda 13,2 myńnan astam maman daıarlanǵan. Búginde 10 922 túlek kelisimsharttyq mindettemelerin tolyq oryndasa, eńbekpen óteý monıtorınginde turǵandardyń 98,4 paıyzy Qazaqstan ishinde eńbek etip júr, — dedi ol.
Onyń aıtýynsha, Bolashaqtyqtar tek óz salasynda tabysqa jetip qana qoımaı, eldiń strategııalyq damýyna úles qosyp keledi.
— Investıtsııa qaıtarymynyń naqty deńgeıin ólsheý ońaı emes, biraq ol jumsalǵan qarajattan kem degende ondaǵan, tipti júzdegen ese asyp túsedi. Jańa óndirister, jumys oryndary men salyqtar arqyly ekonomıkaǵa qosylatyn tikeleı úlesten bólek, qutqarylǵan ómirler men júıeli reformalardyń quny baǵa jetpes joǵary. Máselen, qazirgi kúndelikti ómirimizdi onsyz elestetý qıyn bolatyn HQO sııaqty jańashyldyqtardy dál osy stıpendııanyń alǵashqy túlekteri engizgen bolsa, kún tártibindegi ózekti jasandy ıntellekt, tsıfrlandyrý jumystarynyń kóshbasynda keıingi býyn túlekteri tur, — dedi Jánibek Katrenov.
Sondaı-aq ol qazirgi tańda túlekterdiń qaı salalarda nemene aınalysyp júrgeni ide atap ótti.
— 45 paıyzy jeke sektor men kásipkerlik salasynda jumys isteıdi. 25 paıyzy memlekettik qurylymdarda qyzmet etse, 18 paıyzy ulttyq kompanııalarda eńbek etedi. Qalǵan 12 paıyzy bilim, ǵylym jáne medıtsına salasynda jumys isteıdi. Sońǵy 25 jyl ishinde «Bolashaq» túlekter Qaýymdastyǵy bilim berý, áleýmettik qoldaý, jastar saıasaty, kásipkerlik jáne mádenıet baǵyttarynda 150-den astam jobany júzege asyrdy. Qaýymdastyq granttary arqyly 25 jańa kásiporyn ashyldy. Búginde Qaýymdastyq qatarynda 3 myńǵa jýyq múshe bar, — dedi Keńes tóraǵasy.
Sonymen qatar keńes tóraǵasy bolashaqtyqtardyń bastamasymen Disney jáne Hollywood stýdııalarynyń mýltfılmderi alǵash ret qazaq tiline dýblıajdalyp, elimizdiń 26 qalasynda ınklıýzıvti bilim berýdi qoldaıtyn 71 arnaıy kabınet ashylǵanyn atap ótti.
