«Bolashaq» túleginiń isi medıatsııa tártibimen qaralyp jatyr
ASTANA. KAZINFORM – Valerııa Gavrılenko «Bolashaq» baǵdarlamasymen Ulybrıtanııaǵa oqýǵa ketip, sodan qaıtpaı qalǵan. Kepilge qoıǵan múlkin shyǵaryp alǵannan keıin Halyqaralyq baǵdarlamalar ortalyǵy oqýdyń aqshasyn, ıaǵnı 30 mln teńge memleket qarjysyn garant bolǵan úshinshi taraptan talap etken.
«V.V.Gavrılenkonyń kepilgerleri M.A.Darıbaeva jáne N.A.Vorobevaǵa qatysty isi boıynsha qazirgi sot taǵaıyndaǵan daýdy medıatsııa tártibimen retteý protsesi júrip jatyr. Qazaqstan Respýblıkasynyń «Medıatsııa týraly» Zańynyń 8-babynyń 1-tarmaǵyna sáıkes qatysýshylar kez kelgen málimetti medıatsııa tarapynyń jazbasha ruqsatynsyz jarııa etýge quqyǵy joq jáne ol úshin jaýapkershilik qarastyrylǵan», - delingen agenttik joldaǵan saýaldyń jaýabynda.
Sondaı-aq, «Bolashaq» ortalyǵy istiń túpkilikti dárejesi sottyń tıisti sheshimi zańdy kúshine engennen keıin belgili bolatynyn habarlap otyr.
Eske sala keteıik, bıyl 4 maýsymda Astana qalasynyń Azamattyq ister jónindegi aýdanaralyq sotynda «Halyqaralyq baǵdarlamalar ortalyǵy» AQ-nyń Maqpal Dáribaeva men Natalıa Vorobevadan qaryzdy óndirý týraly aryzy boıynsha sot otyrysy ótti.
Aıta ketsek, Ǵylym jáne joǵary bilim mınıstri Saıasat Nurbek «Bolashaq» baǵdarlamasynyń shartyn buzǵan túlek týraly pikir bildirgen bolatyn.
