«Bolashaq» túlegi Elbasynyń Joldaýyn túsindirý maqsatynda S.Seıfýllın atyndaǵy Qazaq agrotehnıkalyq ýnıversıtetinde boldy
ASTANA. Aqpannyń 13-i. QazAqparat /Gúlmıra Álıakparova/ - «Dıplommen aýylǵa» baǵdarlamasyna agrarlyq sala mamandyqtaryn engizý máselesi sheshilip jatyr.
Bul týraly búgin Elbasynyń el halqyna arnaǵan bıylǵy Joldaýyn talqylaý jáne túsindirý maqsatynda Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń stýdentterimen kezdesken «Bolashaq» stıpendıattary qaýymdastyǵy Keńesiniń múshesi Altaı Kólginov aıtty, dep habarlaıdy QazAqparat.
A.Kólginov, Qazaqstan Prezıdentiniń «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Joldaýynyń negizgi aspektilerine toqtala kele, Elbasy otandyq joǵary oqý oryndaryna álemdik JOO-lardyń reıtıngisine enýdi mindettegenin aıtty. Al qazaqstandyq joǵary mektepterdiń reıtıngisin kóterý aldymen, bilikti jáne básekege qabiletti stýdentterden bastalatynyn, ol úshin ár stýdent óz betinshe izdenýi tıistigin jáne oqyp jatqan mamandyǵyn tereńinen zerttep, ǵylymmen aınalysý qajettigin qadap aıtty. «Eń bastysy, óz kásibiniń mamany bolý. Al «Dıplommen aýylǵa» baǵdarlamasyna agrarlyq mamandyqtardy engizý máselesi sheshilý ústinde», - dedi ol.
Sondaı-aq A.Kólginov, Prezıdent óz Joldaýynda Qazaqstannyń EQYU-ǵa tóraǵalyq etýine jeke toqtalǵanyn tilge tıek etip, álemniń 56 memleketi múshe bolyp tabylatyn bul Uıymǵa tóraǵalyqqa Qazaqstan, táýelsizdik jyldaryndaǵy úlken eńbeginiń arqasynda qol jetkizgenin aıtty. «EQYU-ǵa tóraǵalyq etý Qazaqstandy táýelsiz memleket retinde álemge áıgileý múmkindigimen qatar, úlken jaýapkershilikterdi de júktep otyr», - dedi ol.
Kezdesý barysynda «Bolashaq» túlegi adam kapıtaly, ekonomıkany dıversıfıkatsııalaý, agroónerkásip kesheni men ındýstrııany damytý máselelerine basa toqtaldy.
