«Bolashaq» stıpendııasynyń túlegi Astananyń kóp balaly otbasyna kómektesý úshin qaıyrymdylyq kontsertin beredi
Aıjanmen birge kontsertke klassıkalyq mýzykanyń juldyzdary Borıs Brovtsyn (skrıpka, Ulybrıtanııa) men Ksenııa Sıdorova (klassıkalyq akkordeon, Latvııa) qatysady.
Bılet quny - 1000 teńge. Bılet satylymynan túsken qarajat Astana qalasynyń mańynda turatyn turmysy nashar otbasylarǵa ýaqytsha turǵyn jaılardy salýǵa qurylys materıaldardy jáne olardyń balalaryna mektepke qajetti qural-jabdyqtardy satyp alýǵa jumsalatyn bolady. Ordabaı men Rano Ájelepesovter januıasynda 2, 3, 9 jáne 11 jasar tórt bala bar.
Kontsert «Bolashaq» qaıyrymdylyq qorynyń, British-Kazakh Society uıymynyń, «E-w@y.kz» kompanııasy men Rixos Hotel Astana qonaq úıiniń qoldaýymen uıymdastyrylady. Bas demeýshi - «Air Astana» kompanııasy.
Aıta keteıik, mýzykanttar 27 qazan kúni Almaty qalasynda kontsertterin ótkizedi.
Kontsert baǵdarlamasynda argentınalyq tango men klassıkalyq mýzykanyń úzdik týyndylary bar. Aspapshylardyń baǵdarlamasy klassıkalyq mýzykany súıer qaýym men qarapaıym tyńdarmandar úshin arnalǵan. Kontsert barysynda roıal, skrıpka, akkordeon aspaptarynda oryndalatyn áıgili Astora Pıatstsolanyń argentınalyq tangosy usynylady.
Kontsert barysynda Qazaq Ulttyq óner ýnıversıtetiniń foıesinde Qazaqstandaǵy balalar úıleri men ınternattar tárbıelenýshileriniń sýretteriniń kórme-jármeńkesi ótedi. Sýretterdiń satylymynan túsken qarajat qaırymdylyq maqsattarǵa jumsalatyn bolady.
