«Bolashaq» stıpendııasynda aýyldan shyqqan jastarǵa kvota saqtalady
Qaǵıdalarǵa sáıkes kvota boıynsha halyqaralyq stıpendııaǵa sońǵy úsh jylda aýylda turatyn úmitkerler úmitker bolady. Sondaı-aq, olar aýyldyq eldimekende sońǵy eki jylda jumys isteýi tıis.
«Oǵan qosa, GPA - aýyldyq kvota boıynsha úmitkerler dıplomynyń ortasha baly 4.00-den 2,67-den kem bolmaýy qajet. Sondaı-aq, memlekettik til boıynsha V1 deńgeıinen kem emes, shet tili boıynsha IELTS keminde 9.0-den 6.0, TOEFL: PBT 677-den 500, IBT 120-dan 60-78 nátıjesimen emtıhan tapsyrǵany týraly sertıfıkattyń bolýy mindetti. Úmitkerler bakalavr nemese maman dıplomy boıynsha mamandyqty, mándes mamandyqtardy tańdaı alady», - dep naqtylap ótti, QR BǴM Halyqaralyq baǵdarlamalar ortalyǵynyń prezıdenti Aınur Káribozova.
Aýyldyq kvota boıynsha stıpendıattar Qazaqstan aýmaǵynda 6 aıǵa deıingi merzimde tegin tildik daıyndyqtan ótedi. Buǵan qosa, aýyl turǵyndaryna «Bolashaq» baǵdarlamasyna qujattardy tapsyrý sátinde sheteldik joǵary oqý oryndaryna óz betinshe túsý mindetti emes. Olar stıpendııa taǵaıyndalǵannan keıin baǵdarlama sheńberinde oqýǵa usynylatyn JOO tiziminen oqý ornyn tańdaı alady.
«2020 jyldan bastap «Bolashaq» stıpendııasyn taǵaıyndaý konkýrsyna aýyldyq eldimekennen shyqqan úmitkerlerdi qospaǵanda, jetekshi sheteldik joǵary oqý ornynan shartsyz shaqyrýy bar úmitkerler ǵana qatysatyndyǵyn eskertemiz.
Sonymen qatar, aýyldyq kvota boıynsha túsken stıpendıattarǵa kepil múlkin usyný mindetti emes. Eki kepilger bolsa jetkilikti. Kepilger retinde sońǵy 12 jyl ishinde turaqty tabysy bar, QR-nyń 50 jasqa deıingi azamaty bola alady» delingen habarlamada.
«Óńirlerge jumys isteýge baratyn túlekter úshin eńbekpen óteý merzimi qysqartyldy. Olar 5 jyldyń ornyna 3 jyl eńbekpen óteıtin bolady. Biz bul shara óńirlerge baryp, aýyldy jumys isteıtin bolashaqshylardyń úlesin arttyrýǵa múmkindik beredi dep úmittenemiz» - dep atap ótti Aınur Káribozova.
2020 jyldan bastap qujattardy qabyldaý jáne konkýrstyq irikteý protsesi tolyǵymen avtomattandyryldy. Bul konkýrstyń irikteýi ashyq ótýin qamtamasyz etti. Úmitkerler eGOV memlekettik qyzmetter portaly arqyly ótinim beredi jáne óńirden shyqpaı-aq, portaldaǵy onlaın irikteýdiń barlyq kezeńderinen ótedi.
Bıyl «Bolashaq» halyqaralyq stıpendııasyn taǵaıyndaý konkýrsyna qatysý úshin qujattar qabyldaý 4 mamyrda bastalyp 28 qazanǵa deıin jalǵasady.
2021 jyly «Bolashaq» baǵdarlamasy boıynsha 1 055 stıpendııa bólindi. Olardyń ishinen 555 stıpendııa magıstratýra, rezıdentýra jáne doktorantýra baǵdarlamasy boıynsha bólingen. 500 stıpendııa jańa «Ǵalymdar» sanaty boıynsha taǵaıyndalady. Bul sanat Memleket basshysynyń tapsyrmasy boıynsha álemniń jetekshi ǵylymı ortalyqtarynda ǵalymdardyń taǵylymdamadan ótýine múmkindik berý maqsatynda bekitildi.
«Bolashaq» baǵdarlamasynyń sharty boıynsha memleket stýdentterge oqý shyǵyndaryn, ushyp barý men qaıtý bıletterin, sondaı-aq vıza alymdaryn, medıtsınalyq saqtandyrýdy, aı saıynǵy stıpendııa jáne oqý materıaldaryn satyp alýǵa járdemaqy tóleıdi. Stıpendııa mólsheri qalanyń jáne sol eldiń ómir súrý deńgeıine qaraı ózgeredi. Máselen, Nıý-Iork pen Londonda aı saıynǵy stıpendııa 2 myń AQSh dollarynan asady.
