«Bolashaq» stıpendııasynan aıyrylǵan stýdentterge qandaı shara qoldanylady
ASTANA. QazAqparat - "Halyqaralyq baǵdarlamalar ortalyǵy" AQ oqý úlgerimi nasharlap, stıpendııadan aıyrylǵan stýdentterge qandaı shara qoldanylatynyn túsindirdi, dep habarlaıdy QazAqparat tilshisi ortalyqtyń baspasóz qyzmetine silteme jasap.
Ortalyqtyń málimdeýinshe, "Bolashaq" stıpendııasynan aıyrý nemese "Bolashaq" stıpendııasynan bas tartýdy qabyldaý týraly sheshimdi Respýblıkalyq komıssııa bekitedi jáne ákimshi («Halyqaralyq baǵdarlamalar ortalyǵy» AQ) boryshkerlerdi tıisti sheshim shyǵarylǵan kúnnen 10 jumys kúni ishinde jazbasha habarlandyrady.
«Boryshkerdiń shyǵyndardy bir jolǵy tólemmen óteý múmkindigi bolmaǵan jaǵdaıda ákimshi bereshekti óteý týraly tólemder kestesin qurastyrady jáne erikti túrde óteýdi qarastyratyn 3 jyldan artyq emes merzimge kelisim bekitedi», - dep jaýap berdi "Halyqaralyq baǵdarlamalar ortalyǵy" AQ baspasóz qyzmeti "QazAqparat" HAA tilshisiniń saýalyna.
Jasalǵan Kelisim sheńberinde shyǵyndardy tóleý boıynsha mindettemeler oryndalmaǵan nemese boryshker shyǵyndar somasyn erikti túrde óteýden bas tartqan jaǵdaıda ákimshi shyǵyndardy sot tártibinde óndirip alady.
"Shyǵyndardy boryshkerlerden óteý týraly bitimgershilik kelisimdi jasaý tártibi Qazaqstan Respýblıkasynyń azamattyq zańnamasyna sáıkes júzege asyrylady. Boryshker qaryz somany ótemegen nemese boryshker shyǵyndar somasyn erikti túrde óteýden bas tartqan kezde, Kepilge qoıylǵan jyljymaıtyn múlikti satý Boryshkerdiń qaryz somasyn óteý esebine qaıtarý boıynsha sottyń sheshimi boıynsha júzege asyrylady", - deıdi ortalyqtyń baspasóz qyzmeti.
Eske sala ketsek, 2016 jyly úlgeriminiń tómendigine, ádette, shetel tilin nashar meńgergendigine baılanysty 28 adam granttan aıyrylǵan.
Jalpy statıstıkaǵa sáıkes, 2005 jyldan bastan oqý úlgerimine qatysty 362 adam stıpendııadan qol úzip qaldy, bul shamamen 2 paıyzdy quraıdy. 2013 jyly olar 147 mln teńgeni, 2014 jyly - 272 mln teńgeni, 2015 jyly - 384 mln teńgeni, al 2016 jyly 960 mln teńgeni ótegen. Bıylǵy jyldyń sońyna deıin 1 mlrd teńge tóńireginde óteledi depjosparlanǵan.
