«Bolashaq» stıpendııasyna qujattar qabyldaý merzimi uzartyldy
«Bıyl «Bolashaq» baǵdarlamasyna bastapqyda qujat qabyldaý 15 qyrkúıekke deıin belgilengen edi. Alaıda suranystyń joǵary bolýyna baılanysty bul sharalardy 15 qazanǵa deıin úzartý týraly mınıstrdiń buıryǵy shyqty. Bizde keshe men búgin qujatty tapsyrýǵa kezekke turǵandar sany kúrt artty»,-dedi «Halyqaralyq baǵdarlamalar ortalyǵy» AQ prezıdenti Janbolat Meldeshev tilshilerge bergen suhbatynda.
Ortalyq málimetinshe, sońǵy úsh kúnde ótinimdi 100-den astam adam tapsyrǵan.
Belgili bolǵandaı, 2005 jyldan beri stıpendıattar sany kemdeý bolyp otyr. Máselen, ótken jyly 700 stıpendııa bólinse, onyń 544-i taǵaıyndaldy. Jalpy, 2 myńnan astam qujat qaralǵan eken.
«Aǵymdaǵy jyly da josparlanǵan 600 stıpendıatqa jetkize almaımyz degen kúdik bar. Búginde 251 stıpendııa taǵaıyndaldy. Qabyldanǵan isterdiń sany 800-den asty, 150 úmitker konkýrs synaǵynda. Eger de 100 stıpendııany taǵaıyndaǵannyń ózinde, jalpy sany 350-ge jetedi. Qujattardy qabyldaýdy 15 shildeden bastadyq. Alaıda dástúrli túrde barlyq úmitkerler sońǵy 2-3 kún qalǵanda tapsyra bastaıdy. Sondyqtan bul umtylysty yntylandyrý úshin qujat qabyldaý merzimin uzarttyq»,-dedi Meldeshev.
Taratylǵan málimetterge qaraǵanda, 2017 jyly «Bolashaq» stıpendııasyna qujattardy qabyldaýdyń eki kezeńi jáne olardyń nátıjeleri boıynsha eki konkýrstyq irikteý ótkizildi. Shetelde kadrlar daıarlaý jónindegi respýblıkalyq komıssııa qorytyndylaryna sáıkes 251 stıpendııa taǵaıyndaldy. Olardyń 223-i magıstratýra, 16-sy doktorantýra, 12-si taǵylymdama baǵdarlamalary boıynsha.
Úmitkerler qujattardy «elektrondyq úkimet» portaly, «Azamattar úshin úkimet» memlekettik korporatsııasy arqyly nemese «Halyqaralyq baǵdarlamalar ortalyǵy» AQ-ǵa qolma-qol tapsyra alady. «Bolashaq» stıpendııasy «Magıstratýra», «Doktorantýra», «Rezıdentýra» jáne «Taǵylymdamalar» baǵdarlamalary boıynsha taǵaıyndalady.
