«Bolashaq» stıpendııasy konkýrsyna qatysý úshin 356 azamat qujatyn tapsyrdy

Bul aqparatty «Halyqaralyq baǵdarlamalar ortalyǵy» AQ-nyń baspasóz qyzmeti taratyp otyr.

Ortalyqtyń aqparatyna sáıkes, 148 azamat jalpy konkýrs negizinde, al 20-sy kvota boıynsha jáne 188-i óz betimen túsken. 179 úmitker tehnıkalyq, 167 - gýmanıtarlyq jáne 10-y medıtsınalyq mamandyq boıynsha shetelde bilim alýǵa qyzyǵýshylyq tanytyp otyr. «Bakalavrıat» baǵdarlamasyna - 131 úmitker, «Magıstratýraǵa» - 207, «Doktorantýraǵa» - 3, «Klınıkalyq ordınatýraǵa» - 9 azamat qujattaryn tapsyrdy. Úmitkerlerdiń basym bóligi AQSh, Shveıtsarııa, Kanada jáne Reseıde oqýǵa ynta bildirgen.

• Úmitkerlerdiń myna sanattaryna: aýyl jastaryna, memlekettik qyzmetshilerge, ǵylymı jáne pedagog qyzmetkerlerge jáne ǵylymı taǵylymdamadan ótý úshin ǵylymı qyzmetkerlerge kvota qarastyrylǵan. Halyqaralyq stıpendııa aıasynda belgilengen kvotaǵa ilikkender úshin shet tilin bilýdiń eń tómengi deńgeıi jalpy konkýrs negizinde tapsyrǵan talapkerlerge qaraǵanda tómendetilgen. Sonymen qatar, úmitkerlerdiń osy sanattary úshin keminde 4 oqý semestrinde tildik kýrstardan ótý múmkindigi, ǵylymı taǵylymdamadan ótýge úmitkerlerge uzaqtyǵy keminde 1 oqý semestr bolatyn tildik kýrstar kózdelgen.

«Halyqaralyq baǵdarlamalar ortalyǵy» AQ akademııalyq oqý úshin 2010 jylǵy maýsymnyń 7-sinen shildeniń 30-yna deıin, ǵylymı taǵylymdama úshin maýsymnyń 7-sinen qyrkúıektiń 30-yna deıin qujattar qabyldaıdy.

Jyl saıyn álemniń 25 elinde 3000 -ǵa jýyq stıpendıat bilim alady.