«Bolashaq» stıpendııasy qansha adamǵa berildi

ASTANA. QazAqparat - Aqordada QR Memlekettik hatshysy Gúlshara Ábdiqalyqovanyń tóraǵalyǵymen shetelde kadrlar daıarlaý jónindegi respýblıkalyq komıssııanyń otyrysy ótti, dep habarlaıdy QazAqparat tilshisi.

«Elbasy Nursultan Ábishuly Nazarbaev «Tórtinshi ónerkásiptik revolıýtsııa jaǵdaıyndaǵy jańa múmkindikter» atty bıylǵy Joldaýynda adam kapıtalyn damytý máselesine basa nazar aýdarǵan bolatyn. Osy oraıda biz «Bolashaq» baǵdarlamasynyń múmkindikterin barynsha paıdalanýymyz qajet», - dedi G.Ábdiqalyqova.

Otyrys barysynda QR Bilim jáne ǵylym mınıstrliginiń esebi tyńdaldy. Komıssııa músheleri 76 adamǵa «Bolashaq» stıpendııasyn taǵaıyndaýdy uıǵardy. Olardyń barlyǵy álemniń úzdik ýnıversıtetterinde magıstratýra men doktorantýra boıynsha bilim alyp, kásibı taǵylymdamadan ótetin bolady. Budan bólek, otyrysta stıpendııadan aıyrylǵandardyń máselesi qaraldy.

Aıta keteıik, aldaǵy bes jylda «Bolashaq» baǵdarlamasyna birqatar ózgerister engiziledi. Atap aıtqanda, kvotalyq kategorııalardy alyp tastaý josparlanǵan. Budan bólek, naqty mamandyqtarǵa basymdyq beriletin bolady.