«Bolashaq» stıpendııasynyń tıimdiligi zerttelip jatyr

ASTANA. KAZINFORM — «Bolashaq» baǵdarlamasy ınjenerlik-tehnıkalyq mamandyqtarǵa basymdyq bere bastady.

Bul týraly «Halyqaralyq baǵdarlamalar ortalyǵy» AQ basqarma tóraǵasy Ádil Qusmanov Jibek joly telearnasyndaǵy «Ýáde» baǵdarlamasyna bergen eksklıýzıvti suhbatynda aıtty.

— Búginge deıin ekonomıkanyń túrli salalarynda shamamen 13 myń túlek daıyndaldy. Mysaly, ınjenerlik-tehnıkalyq baǵyt boıynsha — shamamen 37%, gýmanıtarlyq baǵytta — 55% jáne basqa salalar bar. Biraq biz ótken jyldan bastap, jańa ózgeris engizdik jáne ınjenerlik-tehnıkalyq baǵytqa kóbirek nazar aýdarýdy uıǵardyq. Búginde granttar men stıpendııalardyń 60%-dan astamyn dál osy salaǵa bólip jatyrmyz, — dedi ol.

Baǵdarlama júrgizýshisi «Bolashaqtyń» ekonomıka men qoǵamǵa qosqan úlesi týraly suraq qoıdy jáne spıker mundaı baǵalaý keshendi tásildi qajet etetinin atap ótti.

— Ashyǵyn aıtqanda, ekonomıkaǵa, qoǵamǵa qandaı úles qosty degen suraǵyńyz óte kúrdeli. Sebebi ony ártúrli jolmen baǵalaýǵa bolady. Qazir biz Dúnıejúzilik bankpen birlesip, baǵalaý ádistemesin ázirlep jatyrmyz. Basty maqsatymyz — baǵdarlamanyń qanshalyqty tıimdi bolǵanyn túsiný. Taza matematıkalyq, ekonomıkalyq turǵydan qarasaq, «Bolashaq» arqyly oqyǵan azamattardyń eńbek joly men stıpendııaǵa úmitker bolǵan, biraq ótpeı qalǵan adamdardyń jolyn salystyryp, «Bolashaq» túlegi mártebesiniń tıimdiligin eseptegimiz keledi. Qazir osyndaı zertteý júrgizip jatyrmyz. Kúzge qaraı aıaqtaımyz dep oılaımyn, — dedi ol.

Sonymen birge, ortalyq tóraǵasy medıtsınada — Mynjylqy Berdiqojaev pen Dmıtrıı Gorbýnov, atom energetıkasynda — Áset Mahambetov, IT salasynda — Ulan Qaıyrbekov sekildi túrli salada jetistikke jetken túlekterdi mysal etti.

— Túlekterimiz óte kóp. Árıne, jaǵymsyz mysaldar da bar, biraq bul tutas baǵdarlamanyń sátsiz ekenin bildirmeıdi. Sondyqtan aýqymdy turǵyda qarap, osyndaı zertteýler men sotsıologııalyq ólshemder qajet dep sanaımyz. Sonda ǵana naqty sandarmen baǵdarlamamyzdyń tıimdiligin dáleldep kórsete alamyz, — dep túıindedi Á. Qusmanov.

Buǵan deıin Ǵylym jáne joǵary bilim mınıstrligi «Bolashaq» arqyly daryndy oqýshylardy bakalavrıatqa qalaı túsirýge bolatynyn túsindirgen edi.