«Bolashaq» stıpendııasyn alý ońaı bolmaıdy - Saıasat Nurbek

ASTANA. KAZINFORM – Ǵylym jáne joǵary bilim mınıstri Saıasat Nurbek «Bolashaq» baǵdarlamasyna engizilgen ózgeriske qatysty pikir aıtty.

Búgin Úkimettiń otyrysynan keıingi baspasóz máslıhatynda tilshiler «Bolashaq» baǵdarlamasynyń tıimdiligine ekonomıkalyq jáne ınnovatsııalyq taldaý júrgizildi me?» degen suraq qoıdy.

Óz kezeginde S. Nurbek «Bolashaq» baǵdarlamasy arqyly oqýǵa túsý jáne stıpendııa taǵaıyndaý talaptary kúsheıtilip jatqanyn aıtty.

- Keıingi úsh jylda birqatar túbegeıli ózgeris engizildi. Byltyr engizilgen ózgeristiń nátıjesin bıylǵy konkýrsta kórip otyrmyz... Prezıdent talaptardyń ashyqtyǵyn nyǵaıtýdy tapsyrdy. Bıylǵy konkýrsta 981 úmitker qujat tapsyrsa, biraq 217 stıpendııa berildi. Bul turǵyda bir orynǵa konkýrs kúsheıtilgenin baıqaýǵa bolady. Sondyqtan «Bolashaq» stıpendııasyn alý ońaı bolmaıdy, - dedi mınıstr.

Onyń aıtýynsha, qazir atalǵan baǵdarlamanyń túlekteri elimizde jemisti qyzmetin atqaryp jatyr.

Budan buryn habarlanǵandaı, jaqynda «Bolashaq» halyqaralyq stıpendııasy 217 qazaqstandyqqa berilgenin jazǵan edik.