«Bolashaq» stıpendııadan aıyryp, oqytýǵa jumsalǵan qarajatty qaıtarýdy talap etken
ASTANA. KAZINFORM – Astana qalasynyń mamandandyrylǵan aýdanaralyq ákimshilik soty 2017 jyly «Bolashaq» halyqaralyq stıpendııa baǵdarlamasy boıynsha Ulybrıtanııanyń bir ýnıversıtetinde magıstratýra dárejesin alǵan stıpendıattyń ótinishin qarady.
5 jyl ótkennen keıin stıpendıat ýákiletti organdarǵa kepilge salynǵan múlikti aýyrtpalyqtan bosatý týraly ótinishpen júgingen. Alaıda oǵan baǵdarlama erejelerinde kózdelgen mindetti eńbekpen óteýdi oryndamaǵany úshin ótinishi qanaǵattandyrylmady.
— Baǵdarlama sharttaryna sáıkes, túlekter Astana nemese respýblıkalyq mańyzy bar qalalarda keminde 5 jyl (1825 kún), nemese basqa aımaqtarda 3 jyl (1095 kún) jumys isteýge mindetti, — delingen habarlamada.
Talap qoıýshynyń shetelde oqýyn aıaqtaǵannan keıin Astanadaǵy uıymdardaǵy eńbek ótili 1489 kúndi nemese belgilengen merzimniń 82%-yn qurady. Ol mindettemelerin aıaqtamaı, 2021 jyldyń sáýir aıynan bastap Qazaqstannan ketip qalǵan. Talap qoıýshy eńbek mindettemelerin oryndamaýdyń saldary týraly eskertýlerdi tipti elemegen.
Ol sondaı-aq shetelde 336 kún qashyqtan jumys isteýdi esepke alýdy ótingen. Alaıda, bul áreketi sotpen qabyldanbady. Sot eńbekpen óteý túlekterdiń Qazaqstanda shyn máninde fızıkalyq turǵydan bolýyn talap etedi dep uıǵardy. Talap qoıýshynyń qol qoıǵan kelisimshartynda qashyqtan jumys isteý qarastyrylmaǵan, al bul másele boıynsha taraptar arasynda kelisimshart jasalmaǵan.
Sot sondaı-aq «Bolashaq» baǵdarlamasynyń maqsaty — bilikti mamandardy el ekonomıkasyna ınnovatsııalyq tehnologııalardy engizý úshin elge qaıtarý ekenin atap ótti. Eńbek kodeksindegi qashyqtan jumys isteýge qatysty ózgeristerge qaramastan, «Bolashaq» baǵdarlamasy erekshe bolyp tabylady jáne túlekterdiń Qazaqstanda bolýy mindetti dep sanalady. Baǵdarlama erejelerinde qashyqtyqtan jumys isteý týraly ózgerister men tolyqtyrýlar engizilmegen.
— Keıinnen shetelde kadrlar daıarlaý jónindegi Respýblıkalyq komıssııa eńbek mindettemelerin oryndamaýyna baılanysty talap qoıýshyny stıpendııadan aıyryp, oqytýǵa jumsalǵan qarajatty qaıtarýdy talap etti. Ol Komıssııanyń sheshimin de daýlap, sotqa shaǵymdanǵan, — dep habarlady sottan.
Sot komıssııanyń sheshimi onyń quzyreti sheginde qabyldanǵanyn jáne talap qoıýshynyń baǵdarlama boıynsha mindettemelerin oryndamaý týraly zańdy kúshine engen sot sheshimine silteme jasap, talapty qanaǵattandyrýdan bas tartty.
Sheshim zańdy kúshine endi.
Eske sala keteıik, buǵan deıin jumys ótilinen jaltarý úshin «Bolashaq» túlekteri qandaı qýlyqtarǵa baratynyn jazǵan bolatynbyz.