«Bolashaq» stıpendıaty AQSh-taǵy balalarǵa qazaq tilin úıretip júr

NUR-SULTAN. QazAqparat - «Bolashaq» baǵdarlamasynyń stıpendıaty, Los-Andjeles qalasyndaǵy Ońtústik Kalıfornııa ýnıversıtetinde ǵylymı taǵylymdamadan ótip júrgen Ásel Ábildaeva bos ýaqytynda balalarǵa Qazaqstan tarıhy men qazaq tilin úıretip júr, dep habarlaıdy QazAqparat tilshisi.

Halyqaralyq baǵdarlamalar ortalyǵy baspasóz qyzmetiniń habarlaýynsha, Ásel balalarǵa arnalǵan oqý baǵdarlamasyn ázirlegen. Ol óziniń sabaqtarynda geımıfıkatsııa elementterin belsendi qoldanyp, qazaq tilin oqýshysyna jeńil ári qyzyqty etip usynady.

«Meniń oıymsha, shetelde turatyn otandastarym, ásirese balalar ana tilin, mádenıetin, halqynyń tarıhyn bilýi kerek. Balalar qazaq tilin, elimizdiń tarıhyn qýana oqıdy. Men olarǵa uly babalarymyz, handarymyz, batyrlarymyz týraly áńgimeleımin jáne qazaq jazýshylarynyń, aqyndarynyń, ǵalymdarynyń ómirbaıanymen, shyǵarmashylyǵymen tanystyryp otyramyn. Kórnekti aǵartýshy, qoǵam qaıratkeri, ǵalym-reformator, qazaq til biliminiń negizin salýshy Ahmet Baıtursynulynyń 150 jyldyq mereıtoıy qarsańynda balalarmen birge tanystyrylym ótkizip, ult ustazynyń Qazaqstan tarıhyndaǵy orny týraly áńgimelestik», – deıdi «Bolashaq» baǵdarlamasynyń stıpendıaty Ásel Ábildaeva.

Qazir Ásel 7-12 jas aralyǵyndaǵy 40-qa jýyq balany oqytyp júr. Balalar az ǵana ýaqyttyń ishinde ana tilinde sóıleý men jazýdy meńgerip úlgerdi. Balalar ana tilinde bir-birimen pikirlesip, óz oılaryn jetkize alady.